Saudiya Arabistoniga raketa va dronlar orqali hujum tayyorlanayotgani ma’lum bo‘ldi

Saudiya Arabistoni qirollikka qarshi, taxminlarga ko‘ra, Yaman husiylari, Iroqdagi eronparast qurolli tuzilmalar va Islom inqilobi muhofizlari korpusi (KSIR) tomonidan hujumlar tayyorlanayotgani haqida razvedka ma’lumotlarini oldi, deb xabar beradi «Al-Arabiya» manbasiga tayanib.

Manbaning so‘zlariga ko‘ra, Eron tomonidan qo‘llab-quvvatlanadigan guruhlar va KSIR Saudiya Arabistoniga hujum qilishga tayyorlanayotganini ko‘rsatuvchi «ishonchli razvedka ma’lumotlari» mavjud. Ushbu ma’lumotlar Yaman husiylari, Iroq jangarilari va KSIRning hujumlarni tayyorlashda o‘z harakatlarini o‘zaro muvofiqlashtirayotganidan dalolat beradi.

Yig‘ilgan razvedka ma’lumotlarining bir qismi bir vaqtning o‘zida amalga oshirilishi mumkin bo‘lgan hujumlarga tayyorgarlik doirasida raketalar va dronlarning ko‘chirilishini kuzatishni o‘z ichiga oladi. Potensial hujumlar fuqarolik va energetika ob’ektlarini, jumladan, muhim infratuzilma ob’ektlari, aeroportlar va portlarni nishonga olishi mumkin.

Manbaning ta’kidlashicha, Saudiya Arabistoni har qanday tajovuzga javoban barcha zarur choralarni ko‘rishda ikkilanib o‘tirmaydi.

Ko‘p o‘tmay, Eronparast «Ansar Alloh» harakati Saudiya Arabistoni harbiy kuchlarining ehtimoliy hujum oldidan sezilarli darajada to‘planganini aniqlaganini da’vo qilib, Saudiya tomonidan qo‘llab-quvvatlanadigan Yaman kuchlariga ballistik raketalar va dronlar yordamida «yirik hujum» uyushtirganini ma’lum qildi.