Zelenskiy Turkiyada Putin bilan uchrashishga tayyorligini bildirdi

Ukraina Prezidenti Vladimir Zelenskiy CNN Türk telekanaliga bergan intervyusida Rossiya Prezidenti Vladimir Putin bilan Turkiyada muzokaralar o‘tkazishga tayyorligini ma’lum qildi. Uning ta’kidlashicha, Anqara bunday oliy darajadagi uchrashuvni tashkillashtirishda samarali vositachi bo‘la oladi. Ukraina yetakchisi Rajab Toyyib Erdo‘g‘onning ham Putin, ham Donald Tramp bilan yaxshi munosabatlariga umid bog‘lab, turk tomoni vositachiligini yuqori baholadi.

Zelenskiyning so‘zlariga ko‘ra, ehtimoliy sammitning bosh masalasi ishonchli nazorat mexanizmiga ega bo‘lgan to‘liq va shartsiz o‘t ochishni to‘xtatishga erishishdan iborat bo‘lishi kerak. Shu bilan birga, Kiyev o‘z hududlaridan, jumladan Qrim va Rossiya nazorati ostida turgan boshqa maydonlardan voz kechish niyatida emasligini yana bir bor uqtirdi. Zelenskiyning fikricha, avvalo hozirgi front chizig‘i bo‘ylab harbiy harakatlarni to‘xtatish, so‘ngra qolgan masalalarni muhokama qilish zarur.

Shuningdek, Ukraina prezidenti Erdo‘g‘on bilan Qora dengiz xavfsizligi va xavfsiz kemachilikni ta’minlash shartlarini muhokama qilganini aytdi. Xususan, u Ukraina va Rossiya portlariga qatnayotgan savdo kemalarini hujumlardan himoya qilish taklifini ilgari surgan. Bundan tashqari, davlat rahbari noyabr oyi o‘rtalariga qadar Abu-Dabida Ukraina, Rossiya va AQSh texnik delegasiyalarining uch tomonlama muzokaralari rejalashtirilganini xabar qildi. Biroq u faqat texnik konsultasiyalar yetarli emasligini va yakuniy kelishuvlarga erishish uchun yetakchilarning shaxsiy uchrashuvi shartligini urg‘uladi.

Zelenskiy Moskvaga nisbatan sanksiyalarni yumshatishga qarshi chiqdi hamda Turkiya bilan energetika, mudofaa sanoati va qo‘shma ishlab chiqarish sohalaridagi hamkorlikni kengaytirish niyatida ekanini bildirdi.