Tramp o‘z rafiqasi kabi qadrlaydigan yordamchisiga 45 ming dollarlik ta’til puli bergan. Oq uydagilar maoshi qancha?

Tramp yordamchisiga 45 ming dollarlik ta’til puli bergan.

AQSh Oq uyining yuqori lavozimdagi xodimlari ancha yuqori maosh oladi. Shunga qaramay, AQSh prezidenti Donald Tramp o‘z yordamchisi Natali Xarp va yana uch nafar xodimiga 45 ming dollardan pul bergani aytilmoqda. Bu haqda Amerika OAVlari, jumladan, The Washington Post gazetasi xabar berdi.

Gap «ta’til uchun pul sovg‘alari» haqida ketmoqda. Gazeta yordamchiga berilgan mablag‘ miqdoriga e’tibor qaratgan. Chunki Oq uyda bunday lavozimda ishlaydigan xodimlar yiliga taxminan 150 ming dollar maosh oladi. Shu tariqa, berilgan «cho‘ntak puli» uning yillik maoshining qariyb uchdan bir qismiga teng.

Bundan tashqari, avval Fox News telekanalida boshlovchi bo‘lib ishlagan Natali Xarpning Donald Tramp bilan juda yaqin ish munosabatlariga ega ekani aytilmoqda. Tramp qog‘ozda o‘qishni yaxshi ko‘rgani sababli, Xarp uning uchun maqolalar, elektron xatlar yoki ijtimoiy tarmoqlardagi izohlarni portativ printer orqali doimiy ravishda chop etib beradi. Bu hatto Air Force One bortida yoki golf maydonida ham amalga oshiriladi.

Oq uyda uni «inson-printer» — «human printer» deb atashadi.

Jorj Bush kichik prezidentligi davrida Oq uyda axloqiy me’yorlarga rioya etilishini nazorat qilgan huquqshunos Richard Peynter The Washington Post gazetasiga mazkur sovg‘alar amaldagi qonunchilikni buzishi mumkinligini aytdi.

Oq uy matbuot xizmati esa X ijtimoiy tarmog‘ida bunga munosabat bildirib: «Bu yerda gap ketayotgan sovg‘alar mazkur shaxslarning hukumatdagi rasmiy vazifalari bilan hech qanday bog‘liq emas. Shuning uchun ular amaldagi huquqiy va axloqiy me’yorlarga to‘liq mos keladi», — deya ta’kidladi.

Oq uyning anonim xodimi ham Tramp atrofidagi odamlarga Rojdestvo sovg‘alari berish odati borligini ma’lum qildi.

Natali Xarpning sovg‘alar bilan bog‘liq ushbu voqeaga aralashgani ko‘pchilik uchun kutilmagan holat emas. So‘nggi bir necha hafta davomida AQShda Trampning eng yaqin doirasida paydo bo‘lgan bu ayol haqida keng muhokamalar ketmoqda.

U prezidentning eng sadoqatli hamrohlaridan biri sifatida qaraladi. The New York Times nashri Natali Xarp Oq uyda prezidentning oldiga kirish imkoniyatini nazorat qilishi va kechayu kunduz ishlashini yozgan.

Shuningdek, u Trampga maqtovga to‘la yozuvlar qoldirgani haqida ham ma’lumotlar tarqalgan. «Sen men uchun ahamiyatli bo‘lgan barcha narsasan», — deb yozgani aytilgan u bir safar.

Tramp esa, o‘z navbatida, Xarpni Oq uyda uni o‘z rafiqasi va oilasi kabi kuchli qadrlaydigan yagona inson deb hisoblashi aytilmoqda.