Tailand rasman O‘zbekiston fuqarolari uchun vizasiz rejimni bekor qildi

15 sentyabrdan O‘zbekiston fuqarolari Tailandga borish uchun oldindan viza olishi kerak bo‘ladi. Yangi tartib Tailand hukumati tomonidan rasman tasdiqlandi va 15 sentyabrdan kuchga kiradi. Endi safardan oldin Thai e-Visa tizimi orqali onlayn ariza topshirish talab etiladi. Viza narxi — 40 dollar. Ariza onlayn to‘ldiriladi, zarur hujjatlar yuklanadi va viza tasdig‘i elektron pochta orqali yuboriladi. Shu tariqa, so‘nggi yillarda o‘zbekistonliklar orasida eng ommabop sayyohlik yo‘nalishlaridan biri bo‘lgan Tailandga vizasiz safar qilish imkoniyati tugaydi.