Pekin Eron bilan aloqalari sabab Xitoy kompaniyalariga qo‘yilgan AQSh sanksiyalariga keskin qarshi chiqdi

Xitoy Eron bilan aloqalari bahonasida mamlakat kompaniyalari va fuqarolariga qarshi AQSh tomonidan joriy etilgan bir tomonlama sanksiyalarga keskin norozilik bildirdi.

Tasnim News xabar berishicha, Xitoy Savdo vazirligi vakili Syuan Lin Pekin bunday sanksiyalarga qat’iy qarshi ekanini va ular xalqaro huquq nuqtai nazaridan hech qanday asosga ega emas, deb hisoblashini aytdi.

Uning ta’kidlashicha, AQSh sanksiyalari davlatlar o‘rtasidagi normal savdo-iqtisodiy munosabatlarga to‘sqinlik qilmoqda. Shuningdek, bu choralar energetika xavfsizligi va global ta’minot zanjirlari barqarorligiga salbiy ta’sir ko‘rsatmoqda.

Xitoy vakili Vashingtonni o‘z yondashuvini zudlik bilan o‘zgartirishga va Xitoy kompaniyalari hamda fuqarolariga nisbatan joriy etilgan sanksiyalarni bekor qilishga chaqirdi.

Syuan Lin, shuningdek, AQShning Xitoy iqtisodiyotidagi «nomutanosiblik» va «ortiqcha ishlab chiqarish quvvatlari» haqidagi da’volarini Pekinga bosim o‘tkazish uchun bahona hamda proteksionizm sifatida baholadi.

Uning so‘zlariga ko‘ra, barcha davlatlar ko‘p tomonlama hamkorlikni kuchaytirishi, global savdo va ta’minot zanjirlarining barqarorligini ta’minlashga harakat qilishi lozim.