Isroil AQShning Saudiya Arabistoni bilan tuzgan yadroviy kelishuvidan jiddiy xavotirda — Reuters

Qayd etilishicha, kecha, 22 iyul kuni e’lon qilingan va hali AQSh Kongressi tasdig‘idan o‘tishi lozim bo‘lgan kelishuv Saudiya Arabistoniga fuqaroviy yadro dasturini rivojlantirish imkonini berishga qaratilgan.

Isroil bosh vaziri Binyamin Netanyahu hamda uning hukumati hozircha ushbu kelishuv yuzasidan izoh bermagan. Isroil muxolifati esa mazkur kelishuv Isroilning uzoq muddatli xavfsizlik manfaatlariga putur yetkazishini aytmoqda.

"Isroilni chetlab o‘tib Saudiya Arabistoni bilan tuzilayotgan yadroviy kelishuv jiddiy strategik muvaffaqiyatsizlik bo‘lib, xavfsizligimizga tahdid soladi. Saudiya Arabistoni hududida uranni boyitish imkoniyati paydo bo‘lishi mintaqada yadroviy poygaga va xavfli darajada nazorat yo‘qolishiga olib kelishi mumkin", — dedi 27 oktyabrda bo‘lib o‘tadigan parlament saylovlarida Netanyahuni mag‘lub etishga intilayotgan sobiq bosh vazir Naftali Bennet.

Isroil sobiq mudofaa vaziri Avigdor Liberman esa Saudiya Arabistonidagi fuqaroviy yadro dasturi oxir-oqibat yadro quroliga aylanishi va butun Yaqin Sharq bo‘ylab aql bovar qilmas qurollanish poygasiga sabab bo‘lishini aytdi.

Shuningdek, u mintaqadagi yagona yadroviy arsenalga ega davlat deb hisoblanadigan Isroil mazkur kelishuvga qarshi chiqishi va uni to‘xtatish uchun AQSh Kongressiga bosim o‘tkazishi kerakligini ta’kidladi.