Eron bilan urush sabab AQSh harbiy xizmatchilarining armiyani tark etish istagi kuchaymoqda

Eronga qarshi harbiy operasiyalarda ishtirok etgan ayrim amerikalik harbiy xizmatchilar urushning maqsadlari, tinch aholi orasidagi qurbonlar va xalqaro huquq bilan bog‘liq masalalardan xavotir bildirib, harbiy xizmatdan vijdonan voz kechish uchun ariza bermoqda. Bu haqda Tasnim News xabar berdi.

MS NOW telekanali ma’lumotlariga ko‘ra, Eronga qarshi zarbalardan keyin harbiy xizmatdan vijdonan voz kechish maqomini olish bo‘yicha murojaatlar keskin ko‘paygan. Telekanal ariza berish jarayonini boshlagan besh nafar amerikalik harbiy xizmatchi bilan suhbatlashgan.

Ulardan biri Erondagi ayrim ko‘priklarning vayron qilinishi yuzasidan xavotir bildirgan. Uning fikricha, ushbu ob’ektlar harbiy nishon bo‘lmagan bo‘lishi mumkin. Yana bir harbiy xizmatchi AQSh harbiy rahbariyati Eron hududiga havo zarbalari chog‘ida tinch aholi qurbon bo‘lishining oldini olish uchun yetarlicha chora ko‘rmayotganini ta’kidlagan.

Boshqa bir xizmatchi esa narkotiklar kontrabandasida gumon qilingan qayiqlarga raketa zarbalari berilganda, ulardagi odamlar haqiqatan ham harbiy nishon ekaniga qanday ishonch hosil qilinayotganini savol ostiga qo‘ygan.

Eron bilan urush boshlanganidan keyin harbiy xizmatdan vijdonan voz kechish masalasida yordam beruvchi ikki tashkilot murojaatlar soni sezilarli darajada oshganini bildirgan.

Vijdon va urush markazi ishonch telefoni xodimi Mayk Prisnerning aytishicha, Eronga qarshi urush boshlanganidan beri tashkilotga kelib tushayotgan qo‘ng‘iroqlar odatdagidan olti barobar ko‘paygan. Uning ma’lum qilishicha, tashkilot odatda bir yilda taxminan 50 nafar murojaatchi bilan ishlasa, urush boshlanganidan buyon qariyb 140 nafar harbiy xizmatchi murojaat qilgan.

Prisnerning ta’kidlashicha, hozirgi murojaatchilar orasida o‘n yildan ortiq xizmat qilgan harbiylar, ofiserlar va turli yuqori unvondagi xizmatchilar ham bor.

Uning so‘zlariga ko‘ra, murojaat qilganlarning aksariyati o‘z hayoti uchun qo‘rqqani sababli emas, balki urushda ishtirok etishning axloqiy va huquqiy oqibatlaridan xavotirlangani uchun xizmatni tark etishni istamoqda.

Shuningdek, Quaker House harbiy-huquqiy liniyasi ham Eron bilan mojaro boshlanganidan keyin vijdonan voz kechish maqomini olish bo‘yicha murojaatlar ko‘payganini ma’lum qildi. Tashkilot mart oyida 429 ta, aprel oyida esa 440 ta murojaat olgan. Keyingi oylarda ham murojaatlar odatdagidan yuqori darajada saqlanib qolgan.

Tashkilot maslahatchisi Lenor Yargerning ma’lum qilishicha, hozir ular vijdonan harbiy xizmatdan voz kechishni istagan taxminan 30 nafar kishi bilan ishlamoqda. Urushdan oldin bu ko‘rsatkich odatda 5–10 nafarni tashkil etgan.

Murojaat qilgan harbiy xizmatchilarning aytishicha, ular armiyaga qo‘shilgan paytda urush faqat milliy mudofaa uchun va boshqa chora qolmagan hollarda qo‘llanishi kerak, deb hisoblagan. Biroq AQShning harbiy operasiyalari sabablari, tinch aholi orasidagi qurbonlar va urush usullari borasidagi xavotirlar ularning qarashlarini o‘zgartirgan.

Ular endi o‘z e’tiqodlariga zid deb hisoblagan harbiy operasiyalarda ishtirok etishni istamayotganini bildirgan.