Bugundan Prezident maktablariga qabul boshlandi

Bugun, 25 may kunidan boshlab Prezident maktablariga qabul jarayonlari boshlandi. Bu haqida Ta’lim nazorati Telegram-kanali xabar berdi.

Bildirilishicha, ixtisoslashtirilgan ta’lim muassasalari agentligi tizimidagi Prezident maktablariga 2026-2027 o‘quv yili uchun hujjatlar qabuli 25 maydan 14 iyunga qadar onlayn shaklda «my.gov.uz» hamda «ariza.piima.uz» saytlari orqali amalga oshiriladi.

Ma’lumot uchun, Prezident maktablariga 4-sinfni tugatgan o‘quvchilar 5-sinfga qabul qilinadi.

Prezident maktablariga ariza topshirish uchun o‘quvchilarning:

• oxirgi 2 oy davomida tushgan fotosurati;

• tug‘ilganlik haqida guvohnomasi (ya’ni metrikasi);

• tegishli o‘quv yili natijalariga ko‘ra baholar tabelining maktab direktori tomonidan tasdiqlangan nusxasi yoki QR-kod bilan tasdiqlangan elektron tabel;

• ota-onasi (qonuniy vakili)ning fuqarolik pasporti ma’lumotlari;

• bog‘lanish uchun telefon raqamlari talab qilinadi.

Eslatib o‘tamiz, Prezident maktablarida o‘qimoqchi bo‘lgan o‘quvchilarning baholar tabelidagi matematika va tabiatshunoslik fanlaridan 4-sinfdagi yillik baholari «5» (a’lo) bo‘lishi lozim.