Bill Geyts AI bilan bog‘liq xavflarning ortishidan xavotir bildirdi

Microsoft asoschisi Bill Geyts shu yil oxirida Xitoy prezidenti Si Szinpin bilan uchrashishni va sun’iy intellekt(AI) bilan bog‘liq xavflarni yumshatish bo‘yicha xalqaro choralarni taklif qilishni rejalashtirmoqda, deb xabar beradi NBC News. Geytsning so‘zlariga ko‘ra, agar AQSh bunday tashabbus ko‘rsatsa, Xitoy potensial xavfli sun’iy intellekt modellarining chiqarilishini cheklashga rozi bo‘lishi mumkin. Uning jamoasi noyabr oyida Xitoyga tashrif buyurishni rejalashtirmoqda. Geyts shuningdek, sun’iy intellektning xavfli molekulalar yaratish va biologik hujumlarni amalga oshirish qobiliyatini nazorat qilish uchun xalqaro nazorat zarur deb hisoblaydi. U yadroviy inspeksiya tizimi elementlariga, xalqaro aviasiya qoidalariga va ozon qatlamini himoya qilish to‘g‘risidagi bitimlarga asoslangan sun’iy intellektni tartibga soluvchi yangi xalqaro tashkilot yaratishga chaqirdi. Milliarder so‘nggi paytlarda sun’iy intellekt keltirib chiqaradigan tahdidlardan tobora ko‘proq tashvishlanayotganini aytdi. Xususan, u kiberxavfsizlik sinovlarining bir qismi sifatida OpenAI, Anthropic va Meta Platforms platformalari texnologiyalaridan foydalangan holda haqiqiy veb-saytlarni buzish holatlaridan xavotirda. Geytsning fikricha, bunday hodisalar jamiyatni sun’iy intellekt rivojlanishining potensial oqibatlari haqida jiddiyroq o‘ylashga majbur qilishi kerak. Geyts AQSh sun’iy intellektni tartibga solishda yetakchi rol o‘ynashi kerak, deb hisoblaydi, ammo xalqaro hamjamiyat qaror qabul qilish uchun aniq mezonlarni belgilashi kerak. U o‘z blogida tengsizlikni kuchaytirmaydigan va zaif guruhlarga zarar yetkazmaydigan sun’iy intellektni yaratishni eng muhim ustuvor vazifa deb atadi. Uning fikricha, bu vazifa iqlim o‘zgarishi va sog‘liqni saqlash inqirozlaridan muhimroqdir. Geyts jamg‘armasi 2045 yilga borib 200 milliard dollar sarflashni rejalashtirmoqda va sun’iy intellektga tobora ko‘proq e’tibor qaratmoqda. Tashkilot Anthropic bilan sun’iy intellektga asoslangan prenatal skrining bo‘yicha va OpenAI bilan Ruandadagi tibbiyot xodimlari uchun vositalarni ishlab chiqish bo‘yicha hamkorlik qilmoqda. Geyts shuningdek, ishchilarni almashtirish uchun sun’iy intellektdan foydalanadigan kompaniyalarga soliq solishni va mavjud ish o‘rinlarining 40% gacha odamlar uchun ajratilishini ko‘rib chiqishni taklif qildi. Uning so‘zlariga ko‘ra, jamiyat hozirda mehnat bozoridagi kelajakdagi o‘zgarishlar ko‘lamini kam baholamoqda.