AQSh Markaziy Osiyo mamlakatlari uchun savdo cheklovlarini bitta shart bilan bekor qiladi

AQSh ma’muriyati Markaziy Osiyo mamlakatlari bilan savdoni cheklovchi Jekson-Venik tuzatishining bekor qilinishini qo‘llab-quvvatlashga tayyor. Biroq, buning evaziga Vashington ushbu mamlakatlardan o‘z bozorlarini Amerika tovarlariga ochish uchun choralar ko‘rishlarini kutmoqda.

Bu haqda AQSh savdo vakili Jeymison Grir ta’kidladi.

"Agar bu Kongress uchun juda muhim masala bo‘lsa, menimcha, biz uni qo‘llab-quvvatlaymiz", dedi Grir AQSh Senatining Moliya qo‘mitasi oldida bo‘lib o‘tgan tinglovda, qonun chiqaruvchi ma’muriyat tuzatishni bekor qilishni qo‘llab-quvvatlaydimi yoki yo‘qmi deb so‘raganida.

Grir shuningdek, AQSh "mintaqadagi mamlakatlar bilan o‘zaro manfaatlilik tamoyiliga asoslangan savdo aloqalarini o‘rnatishga" e’tibor qaratayotganini qo‘shimcha qildi. Uning qo‘shimcha qilishicha, agar bu jarayon ushbu mamlakatlar o‘z bozorlarini Amerika tovarlariga ochishi bilan birga bo‘lsa, Vashington ushbu qo‘shimcha chorani qo‘llab-quvvatlashi mumkin.

Shuni ta’kidlash kerakki, Jekson-Venik tuzatishi AQShda 1974 yilda qabul qilingan. Hujjatda AQSh va Sovet Ittifoqi o‘rtasidagi savdo munosabatlarini normallashtirish SSSRdan yahudiylarning ko‘chib ketishi masalasi bilan bog‘liq.

Sovet Ittifoqi parchalanganidan so‘ng, ushbu tuzatish bir qator possovet respublikalari uchun amalda qoldi. Rossiya uchun bu cheklovlar 2012 yilgacha amalda bo‘ldi. Keyinchalik tuzatish bekor qilindi, ammo Qo‘shma Shtatlar "Magniskiy qonuni" deb nomlanuvchi qonunni qabul qildi. Ushbu qonun Qo‘shma Shtatlar tomonidan inson huquqlarini buzishda ayblangan Rossiya amaldorlariga qarshi sanksiyalarni nazarda tutadi.