Zelenskiy: RF armiyasi oktyabr oyida rekord darajada yo‘qotishga uchradi

Ukraina Prezidenti Vladimir Zelenskiyning ma’lum qilishicha, oktyabr oyida Rossiya qo‘shinlari halok bo‘lganlar va og‘ir yaradorlar bilan birgalikda 54 400 nafar harbiy xizmatchisini yo‘qotgan — bu keng ko‘lamli urush boshlanganidan beri qayd etilgan eng yuqori oliy ko‘rsatkichdir.

Bundan tashqari, Ukraina tomonining baholashicha, 21 oktyabr kuni Rossiya 2 250 nafar harbiysini yo‘qotgan bo‘lib, bu ham bir kunlik yo‘qotishlar bo‘yicha rekord ko‘rsatkich hisoblanadi. Shunga qaramay, oktyabr oyida Ukraina Qurolli Kuchlari 96,2 km² hududni ozod qilishga erishdi, bu RF Qurolli Kuchlari tomonidan egallangan maydondan 10,4 km² ga ko‘pdir.

«Biz pozisiyalarni ushlab turibmiz, hududlarni ozod qilyapmiz va urushning har bir kuni agressorga eng qimmatga tushishi uchun barcha imkoniyatlarni ishga solyapmiz. Ushbu aqlsiz yo‘qotishlarni to‘xtatish uchun Rossiyaning o‘t ochishni to‘xtatish va diplomatiya yo‘lini tanlashi kifoya», — deya ta’kidladi Zelenskiy.

Ushbu bayonot ortidan The Economist jurnali o‘z hisob-kitoblarini e’lon qildi. Nashr ma’lumotlariga ko‘ra, Ukrainadagi keng ko‘lamli urush boshlanganidan beri Rossiyaning umumiy yo‘qotishlari (halok bo‘lganlar va yaradorlar) 1,4 milliondan 2,1 million kishigacha yetishi mumkin. Nashrning baholashicha, halok bo‘lganlar soni 374 mingdan 770 ming kishigachani tashkil etmoqda.