AQSh prezidenti Donald Tramp vise-prezident Jey Di Vensni Eron bilan muzokaralar jarayonidan chetlashtirdi. Bu qaror Vensning Eronga qarshi urushni tanqid qilganidan bir hafta o‘tib qabul qilindi.
Reuters agentligining xabar berishicha, Tramp 12 noyabr kuni AQShga Eron bilan kelishuv tuzishning hojati yo‘qligini bildirgan.
«Bizga Eron bilan kelishuv kerak emas. Bu davr allaqachon o‘tib ketgan», — deb yozgan u Truth Social ijtimoiy tarmog‘ida.
Shuningdek, Tramp Vensga demokratlar boshqarayotgan shtatlar va shaharlardagi korrupsiya hamda jinoyatchilik masalalariga e’tibor qaratishni topshirgan.
The Washington Post bergan ma’lumotga ko‘ra, Vens so‘nggi kunlarda Tehron bilan muloqotni qayta tiklash va urushni muzokaralar orqali yakunlash imkoniyatlarini o‘rganayotgan edi.
Avvalroq vise-prezident respublikachilarning Kongressga oraliq saylovlardagi mag‘lubiyatini Eron bilan urushning iqtisodiy va siyosiy oqibatlari bilan bog‘lagan.
«Mag‘lubiyatimizga sabab — urush», — degan edi Vens.
U shuningdek, urushni to‘xtatish bo‘yicha avval bergan tavsiyasi to‘g‘ri bo‘lganini ta’kidlagan.
Vens aprel oyida Pokistonda Eron vakillari bilan o‘tkazilgan muzokaralarda AQSh delegasiyasiga rahbarlik qilgan edi.
Hozircha Trampning qaroriga aynan Vensning urush haqidagi tanqidiy fikrlari sabab bo‘lgani rasman tasdiqlanmagan. Shu bilan birga, AQSh prezidentining bayonoti Vashingtonning Eron bilan diplomatik muzokaralarni davom ettirishga munosabati o‘zgarganini ko‘rsatmoqda.