АҚШ президенти Доналд Трамп вице-президент Жей Ди Вэнсни Эрон билан музокаралар жараёнидан четлаштирди. Бу қарор Вэнснинг Эронга қарши урушни танқид қилганидан бир ҳафта ўтиб қабул қилинди.
Reuters агентлигининг хабар беришича, Трамп 12 ноябр куни АҚШга Эрон билан келишув тузишнинг ҳожати йўқлигини билдирган.
«Бизга Эрон билан келишув керак эмас. Бу давр аллақачон ўтиб кетган», — деб ёзган у Truth Social ижтимоий тармоғида.
Шунингдек, Трамп Вэнсга демократлар бошқараётган штатлар ва шаҳарлардаги коррупция ҳамда жиноятчилик масалаларига эътибор қаратишни топширган.
The Washington Post берган маълумотга кўра, Вэнс сўнгги кунларда Теҳрон билан мулоқотни қайта тиклаш ва урушни музокаралар орқали якунлаш имкониятларини ўрганаётган эди.
Аввалроқ вице-президент республикачиларнинг Конгрессга оралиқ сайловлардаги мағлубиятини Эрон билан урушнинг иқтисодий ва сиёсий оқибатлари билан боғлаган.
«Мағлубиятимизга сабаб — уруш», — деган эди Вэнс.
У шунингдек, урушни тўхтатиш бўйича аввал берган тавсияси тўғри бўлганини таъкидлаган.
Вэнс апрел ойида Покистонда Эрон вакиллари билан ўтказилган музокараларда АҚШ делегациясига раҳбарлик қилган эди.
Ҳозирча Трампнинг қарорига айнан Вэнснинг уруш ҳақидаги танқидий фикрлари сабаб бўлгани расман тасдиқланмаган. Шу билан бирга, АҚШ президентининг баёноти Вашингтоннинг Эрон билан дипломатик музокараларни давом эттиришга муносабати ўзгарганини кўрсатмоқда.
АҚШ ва Эрон дастлабки келишувга эришиш сари илгариламоқда
"Европаликлар Абу-Дабига келишибди — майли, меҳмонхоналарида ўтираверсинлар"
Россиядан АҚШга йўл олган учта дизель ташувчи танкер ҳам йўналишини ўзгартирди
