“Sport yuksak madaniyat, vatanparvarlik tuyg‘ularini shakllantirishda ham muhim o‘rin tutadi. Bu sohada erishilgan yutuqlar mamlakatni dunyoga tanitadi, barcha yurtdoshlarga g‘urur-iftixor bag‘ishlaydi.”.
SH.M.Mirziyoyev
Davlatimiz rahbari tomonidan ilgari surilgan yoshlar ma’naviyatini yuksaltirish va ularning bo‘sh vaqtini mazmunli tashkil etish bo‘yicha bir nechta g‘oyalarni o‘z ichiga olgan beshta muhim tashabbusning to‘rtinchi yo‘nalishi ijrosi yuzasidan O‘zbekiston Respublikasi Milliy gvardiyasi tizimida ko‘plab tadbirlar tashkil etib kelinmoqda. Shu qatorda Harbiy-texnik institut pedagoglari va kursantlari o‘z tashabbuslari ostida yoshlarni sportga keng jalb qilish maqsadida qamrovli ishlarni amalga oshirmoqdalar.
Kuni kecha Milliy gvardiya Harbiy-texnik intituti tashabbusi bilan Olmazor tumani umumta’lim maktablarining 10-11-sinf o‘quvchilari o‘rtasida sportning voleybol hamda stol tennisi turlari bo‘yicha Olmazor tuman birinchilik musobaqalari o‘tkazildi. Mazkur musobaqalarda 34 ta umumiy o‘rta ta’lim maktablarining o‘quvchilari faollik ila qatnashdilar va bu bilan sport sohasida ham ta’lim olishda ortda qolmasliklarini isbotladilar. Chempionatlar yakuniga ko‘ra barcha g‘oliblar tashkilotchilar tomonidan medal va esdalik sovg‘alari bilan taqdirlandilar.
Shuningdek, Harbiy-texnik institut tomonidan Toshkent shahrining Olmazor tumanida joylashgan 8 ta umumiy o‘rta ta’lim maktablari (№ 15, 29, 185, 196, 249, 261, 278, 326) va 1 ta imkoniyati cheklangan bolalar maktab-internati (№102)da faoliyati yo‘lga qo‘yilgan jiu-jisu bo‘yicha bepul sport to‘garaklari qatnashchilari o‘rtasida “Jiu-jisu sport turi bo‘yicha yoshlar va o‘smirlar o‘rtasida tuman ochiq chempionati” bo‘lib o‘tdi.
O‘zbekiston Respublikasi Milliy gvardiyasi Harbiy-texnik instituti, O‘zbekiston Jiu-jisu federasiyasi va Toshkent shahar Olmazor tumani Xalq ta’limi bo‘limi hamkorligida tashkil etilgan musobaqada o‘quvchi-yoshlar murabbiylaridan o‘rgangan ko‘nikmalarini sport maydonida muvaffaqiyatli namoyish etib, faxrli o‘rinlar va bir qator nominasiyalar bo‘yicha munosib taqdirlandilar.
Ushbu sport tadbirlarini tashkil etishdan asosiy maqsad yoshlarimizning sportga bo‘lgan qiziqishlarini yanada oshirish, ular orasidan bo‘lg‘usi respublika va xalqaro chempionatlari g‘oliblarini tayyorlash, sport orqali yosh avlodni jismonan sog‘lom va ma’naviy yetuk qilib tarbiyalashdan iboratdir.