Shahboz Sharif Pokistonning g‘alabasini e’lon qildi

Pokiston xalqi 7 mayga o‘tar kechasi Hindiston havo kuchlarining keng ko‘lamli hujumini qaytarishda yuqori mahorat, vatanparvarlik va hamjihatlik namoyish etgan milliy qurolli kuchlarning "buyuk g‘alabasi" bilan faxrlanishi lozim.

Geo TV telekanali xabar berishicha, Islom Respublikasi Bosh vaziri Shahboz Sharif mamlakat Milliy assambleyasi (parlamentning quyi palatasi) majlisida so‘zga chiqib, shunday degan.

"O‘tgan kecha Hindiston 80 ta qiruvchi samolyot yordamida Pokiston hududining olti turli joyiga, jumladan Ozod Jammu va Kashmir viloyati, Baxavalpur, Shakargarh va Sialkotga havo hujumi uyushtirishga urindi. Biroq Pokiston harbiy-havo kuchlari [Hindiston harbiy-havo kuchlarining] beshta samolyotini, shu jumladan uchta Rafale qiruvchi samolyotini urib tushirdi. Ulardan biri [Hindistonning] Batxinda tumanida qulab tushdi. Bundan tashqari, bir nechta uchuvchisiz uchish apparatlari ham yo‘q qilindi," deya Sharifning so‘zlarini keltirmoqda telekanal.

Sharif, shuningdek, "Pokiston qurolli kuchlari Hindistonga mamlakatning qudrati va tayyorligini ko‘rsatadigan kuchli zarba berganini" ta’kidladi.

"Javob choralarimiz dushmanni sarosimaga solib, Pokistonning yadroviy davlat sifatidagi qudrati, jasorati va kuchini anglashga majbur qildi. Bu ular tunlari bedor bo‘lishiga sabab bo‘lmoqda. Qurolli kuchlarimiz janglarda toblangandir," - dedi Pokiston bosh vaziri. U Pokiston aviasiyasi hind qiruvchi samolyotlarining aloqa tizimlarini ishdan chiqarishga erishgani va ularni Srinagarga (Hindistonning Jammu va Kashmir ittifoqdosh hududi) qaytishga majbur qilganini ta’kidladi.

Sharifning aytishicha, Pokiston xalqi "bu ulug‘ g‘alaba bilan tabrikka sazovor, chunki qurolli kuchlar puxta maslahat va rejalashtirish asosida hamjihatlikda harakat qilib, o‘z kasbiy mahorati va vatanparvarligini namoyon etdi." U yana qo‘shimcha qildi: Pokiston Hindiston harbiy-havo kuchlarining yanada ko‘proq samolyotini ag‘darib tashlashi mumkin edi.