Rossiya va Xitoy Marsni o‘rganish bo‘yicha qo‘shma missiya uchun texnika ishlab chiqarishni boshladi

Rossiya va Xitoy Marsni o‘rganishga qaratilgan qo‘shma kosmik missiya uchun asbob-uskunalar va texnik vositalar ishlab chiqarishni boshladi. Bu haqda «Roskosmos» davlat korporasiyasi bosh direktori Dmitriy Bakanov ma’lum qildi, deb xabar berdi RIA Novosti.

Bakanov Sankt-Peterburgda Rossiya va Xitoy hukumat rahbarlari ishtirokida o‘tkazilgan uchrashuvda qatnashgan.

«Bizda “Chan’e-7” qo‘shma oy missiyasi ham bor. Shuningdek, Marsni o‘rganish bo‘yicha qo‘shma missiyani ham boshlayapmiz — sayyorani tadqiq qilish uchun asbob-uskunalar va texnik vositalar ishlab chiqarilmoqda», — deya Bakanovning so‘zlarini keltirdi «Roskosmos».

«Roskosmos» rahbari Xitoyni Rossiyaning muhim hamkorlaridan biri deb atadi.

Uning ta’kidlashicha, ikki mamlakat Yerni masofadan zondlash ma’lumotlarini o‘zaro almashmoqda, shuningdek, Rossiyaning GLONASS va Xitoyning «Beydou» sun’iy yo‘ldosh navigasiya tizimlari signallaridan hamkorlikda foydalanmoqda.