Bir guruh qurollangan shaxslar Liviya Hisob palatasining Tripolidagi bosh qarorgohiga bostirib kirishdi va muassasa rahbarining yangi o‘rinbosari tayinlanishiga kuch bilan erishishga urinishdi. «Al Hadath» telekanali xabar berishicha, niqob taqqan qurollangan shaxslar Anvar al-Xaushning Hisob palatasi rahbari o‘rinbosari lavozimiga kirishishini ta’minlash maqsadida binoga bostirib kirishgan.
Tegishli qaror Liviya Oliy davlat kengashi raisi Muhammad Takala tomonidan qabul qilingan edi. Biroq bu tayinlov ham kengashning o‘z ichida, ham mamlakat sharqida faoliyat yurituvchi bir palatali parlament — Vakillar palatasi tomonidan e’tirozlarga sabab bo‘ldi. Telekanal ma’lumotlariga ko‘ra, qurollangan shaxslar Liviya Milliy birlik hukumatiga bo‘ysunuvchi 444-brigadaga tegishlidir.
BMTning Liviyani qo‘llab-quvvatlash bo‘yicha missiyasi bahsli kadrlar qarorini majburan o‘tkazish maqsadida kuch ishlatilishi va qo‘rqitish harakatlarini qoraladi. Missiya Hisob palatasi faoliyatiga qurolli aralashuvni zudlik bilan to‘xtatishni va qurollangan shaxslarni binodan olib chiqib ketishni talab qildi. BMT bu kabi harakatlar qonun ustuvorligi va davlat institutlarining mustaqilligiga tahdid solayotganini ta’kidladi hamda tayinlovlar bilan bog‘liq nizolarni faqat qonunchilikda nazarda tutilgan mexanizmlar orqali hal qilishga chaqirdi.
Yuz bergan voqealar fonida Hisob palatasi xodimlari o‘z xavfsizligi va muassasa mustaqilligi ta’minlangunga hamda uning faoliyatiga aralashuvlar to‘xtatilgunga qadar ish faoliyatini vaqtincha to‘xtatishlarini e’lon qilishdi. Liviya Hisob palatasi davlat xarajatlari va byudjet mablag‘laridan foydalanilishini nazorat qiluvchi mamlakatdagi asosiy nazorat organlaridan biri hisoblanadi.
O‘zbekistondan uchgan ikkita samolyot va yana 370 dan ortiq boshqa reyslar dron tahdidlari tufayli Moskvaga qo‘na olmadi
Shohjahon Ergashevning Toshkentdagi jangi janjal bilan nihoyasiga yetdi
40 mln odam Janubiy Osiyodan ko‘chishga majbur bo‘lishi mumkin
