Pentagon 2027 yilgacha avtonom jangovor tizimlar qo‘mondonligini tashkil etmoqchi

AQSh Mudofaa vazirligi 2027 yil oktyabr oyiga qadar avtonom jangovor tizimlardan foydalanish bo‘yicha alohida qo‘mondonlik tashkil etishni rejalashtirmoqda. Bu haqda Pentagonning tegishli tashabbusi bayonotida ma’lum qilingan, deb xabar berdi RIA Novosti.

Avvalroq AQSh Mudofaa vaziri Pit Hegset uchuvchisiz uchish apparatlari bo‘yicha yangi harbiy qo‘mondonlikni tashkil etishga qaratilgan «Ajenkur» (Agincourt) dasturi ishga tushirilganini e’lon qilgan edi.

Dasturning asosiy vazifalaridan biri — 2027 yil 1 oktyabrga qadar to‘rt yulduzli general boshchiligidagi Avtonom jangovor harakatlar qo‘mondonligini (AUTOWARCOM) tashkil etish. Tashkilotga harbiy tizimda keng ko‘lamli institusional o‘zgarishlarni amalga oshirish uchun zarur vakolatlar berilishi rejalashtirilgan.

Avvalroq Bloomberg agentligi Pentagon AQShda arzon zarba beruvchi LUCAS uchuvchisiz uchish apparatlarini ommaviy ishlab chiqarishni yo‘lga qo‘yishni rejalashtirayotgani haqida xabar bergan edi.

Bir dona LUCAS dronining narxi taxminan 55 ming dollar bo‘lishi kutilmoqda. Eronning «Shahed» dronlari arxitekturasi asosida ishlab chiqilgan ushbu loyiha qimmatbaho qanotli raketalarning bir qismini arzonroq qurollar bilan almashtirishga qaratilgan.