Ombudsman bog‘chadagi 5 yoshli qizaloq voqeasi yuzasidan Vazirlikka taqdimnoma kiritdi

Bolalar ombudsmani Namangan viloyati Uchqo‘rg‘on tumanidagi bog‘chalardan birida tarbiyalanuvchi bolaga nisbatan sodir etilgan jinsiy zo‘ravonlik yuzasidan Maktabgacha va maktab ta’lim vazirligiga taqdimnoma kiritdi.

Qayd etilishicha, taqdimnoma orqali Bolalar ombudsmani maktabgacha ta’lim tashkilotida tarbiyalanuvchiga nisbatan jinsiy zo‘ravonlik holati yuzasidan o‘tkazilayotgan xizmat tekshiruvi natijalarini tanqidiy ko‘rib chiqish, aniqlangan kamchiliklar yuzasidan tegishli choralar ko‘rilishini hamda mas’ul xodimlarning belgilangan tartibda javobgarligi masalasini ta’minlashni so‘ragan.

Shuningdek, mazkur hodisaning sodir etilishiga imkon bergan sabab va shart-sharoitlarni bartaraf etish, barcha maktabgacha ta’lim tashkilotlarida bolalar xavfsizligini ta’minlash, kelgusida ushbu holatlarga takroran yo‘l qo‘ymaslik hamda ularning oldini olishga qaratilgan zarur choralar ko‘rish talab etilgan.

Jumladan,

respublikaning barcha maktabgacha ta’lim tashkilotlarida bolalar xavfsizligini qat’iy ta’minlash choralarini kuchaytirish;

maktabgacha ta’lim tashkilotlari xodimlarining o‘z kasbiy vazifalarini bajarishi ustidan mas’ullar tomonidan manzilli tekshiruvlar tashkil etish;

maktabgacha ta’lim tashkilotlarida bolalar xavfsizligini ta’minlashga qaratilgan ichki nazorat mexanizmlari qayta ko‘rib chiqilib, aniqlangan kamchiliklarni bartaraf etish zarurligi ko‘rsatilgan.

Qonunchilikka muvofiq, taqdimnoma ijrosi yuzasidan amalga oshirilgan ishlar natijasi haqida Vazirlik 15 kunlik muddatda Bolalar ombudsmaniga barcha hujjatlar nusxasini ilova qilgan holda ma’lumot berishi zarurligi belgilangan.

Avvalroq Uchqo‘rg‘on tumanidagi davlat bog‘chasida 5 yoshli qizaloq 52 yoshli xo‘jalik ishlari bo‘limi mudiri tomonidan zo‘rlab kelingani xabar qilingandi. Holat yuzasidan jinoyat ishi qo‘zg‘atilgan. Gumonlanuvchi ushlangan va ehtiyot chorasi sifatida qamoqqa olingan.