“Makka pakti" kuchga kirdi: Turkiya va Pokiston Saudiyaga o‘z qo‘shinlarini joylashtirmoqchi

Turkiya va Pokiston Saudiya Arabistoniga harbiylarni yuboradi. Qaror dushanba kuni Yamandagi husiylarning raketa va dron hujumlaridan so‘ng qabul qilindi. Uch davlat 7 avgust kuni imzolagan mudofaa paktiga ko‘ra, ulardan biriga hujum qilish barchasiga hujum hisoblanadi. Berliner Zeitung xabariga ko‘ra, qo‘shinlar soni va muddatlari oshkor etilmagan.

Uch davlat Pokiston Tashqi ishlar vazirligi tomonidan e’lon qilingan qo‘shma bayonot qabul qildi. Unda aytilishicha, pakt «zudlik bilan» kuchga kiradi: kelishilgan qo‘shinlar va harbiy resurslarni ajratish va ularni Saudiya Arabistoniga «tezda ko‘chirish»ni ta’minlash kerak. Qaysi qismlar va qanday vazifa bilan jo‘natilishi bayonotda ko‘rsatilmagan.

Saudiya Arabistoni mudofaa vaziri Xolid bin Salmon qirollik va uning muqaddas qadamjolariga hujumlarga qarshi «jamoaviy tiyib turish» choralari qo‘llanilayotganini aytdi.

Sentyabr oyi oxirida Saudiya Arabistoni Makka janubida husiylarning dronini qo‘lga olganini ma’lum qilgan edi. Husiylar islom ziyoratgohlarini nishonga olganini rad etmoqda.

Husiylar, shuningdek, Ar-Riyoddagi Saudi Aramco davlat neft kompaniyasi ob’ektiga ballistik raketalar va dronlar bilan hujum qilganini ma’lum qildi.