Keniyada diniy oqim yetakchisi 191 kishining o‘limida aybdor deb topildi

Keniyada diniy oqim yetakchisi Pol Makkenzi 190 nafar bola va bir nafar kattaning o‘limiga aloqador qotilliklar bo‘yicha aybdor deb topildi. U bilan birga uning 29 nafar tarafdori ham aybdor deb topilgan. Bu haqda BBC xabar berdi.

Tergov ma’lumotlariga ko‘ra, Makkenzi o‘zi asos solgan «Xalqaro ezgu xabarlar vazirligi» diniy oqimi a’zolariga farzandlarini och qoldirishni buyurgan. U bu orqali bolalar «Iso bilan tezroq uchrashishi»ni da’vo qilgan. Shuningdek, u zamonaviy ta’lim va tibbiyotni qoralab, izdoshlarini ulardan voz kechishga chaqirgan.

Sud jarayonida Makkenzi va uning sheriklari qotillik hamda odamlarni o‘limga majburlash ayblovlarini rad etgan. Biroq tergov materiallarida oqim a’zolari ochlikdan tashqari, bo‘g‘ish va kaltaklash orqali ham o‘ldirilgani qayd etilgan. Hukm bo‘yicha jazo 6 noyabr kuni e’lon qilinishi kutilmoqda.

2023 yilda Keniyaning Hind okeani sohili yaqinidagi Shakaxola o‘rmonida yuzlab odamlarning jasadlari topilganidan keyin Makkenzi va uning tarafdorlari hibsga olingan. Keyingi tekshiruvlar davomida jami 400 dan ortiq jasad aniqlangan. Qurbonlarning ko‘pchiligi shaxsi aniqlanmagan holda qolgan.

Maqolada keltirilishicha, Makkenzi 2003 yilda diniy oqimga asos solgan. Keyinchalik uning izdoshlari soni Keniya bo‘ylab minglab kishiga yetgan, oqim hatto o‘z telekanaliga ham ega bo‘lgan. 2019 yilda u asosiy tarmog‘ini yopib, izdoshlarini Malindi shahri yaqinidagi Shakaxola o‘rmoniga ko‘chirgan.

Oqimning ayrim a’zolari hanuzgacha Makkenziga ishonishda davom etmoqda. Shunday izdoshlardan biri Piter Shukrananing aytishicha, onasi zarur dorilarni zararli deb hisoblab tashlab yuborgani sababli u o‘rmonda hayotini yo‘qotishiga oz qolgan. U kasalxonada davolanganidan keyin ham Makkenzini yaxshi inson va o‘z ruhoniysi deb bilishini aytgan.

Makkenzi va oqimning boshqa rahbarlari qotillikdan tashqari terrorizm, izdoshlarni radikallashtirish hamda bolalarni ta’lim olish imkoniyatidan mahrum qilishda ham ayblanmoqda.