Fransiyada maktablardagi ommaviy namoyishlar fonida 600 dan ortiq kishi qo‘lga olindi

Fransiya maktablarida ikki hafta avval boshlangan namoyishlar ommaviy tartibsizliklarga aylandi. Mamlakatning turli shaharlarida avtomobillar va chiqindi konteynerlariga o‘t qo‘yish, maktab binolariga zarar yetkazish holatlari kuzatilgan. Shuningdek, o‘qituvchilarga hujum qilingan, polisiya xodimlariga esa tosh va feyerverklar otilgan.

Fransiya Ichki ishlar vazirligi ma’lumotiga ko‘ra, 625 kishi qo‘lga olingan, 83 nafar polisiya xodimi va jandarm jarohatlangan. Ta’lim vazirligi esa 119 nafar o‘quvchi va maktab xodimi jabrlanganini ma’lum qildi.

Namoyishlar jami 356 ta ta’lim muassasasiga ta’sir ko‘rsatgan. Dastlab o‘quvchilar maktablarni moliyalashtirish yetarli emasligi, o‘qituvchilar tanqisligi va ta’lim tizimidagi boshqa muammolarga qarshi chiqqan. Keyinchalik namoyishlar zo‘ravonlikka aylangan.

Fransiya prezidenti Emmanuel Makron yoshlarning xavotirlari asosli ekanini tan olgan, biroq polisiya, o‘qituvchilar va jurnalistlarga nisbatan zo‘ravonlikni hech narsa bilan oqlab bo‘lmasligini ta’kidlagan.

Ayni paytda bir nechta o‘quvchi jarohatlanganidan so‘ng polisiya kuch ishlatish vakolatidan ehtimoliy oshirib foydalangani bo‘yicha uchta holatni ham tekshirmoqda. Makron polisiya tomonidan sodir etilgan qonunbuzarliklar ham qonun doirasida jazolanishi kerakligini aytdi.

Fransiya prezidentining fikricha, zo‘ravonlik uchun asosiy javobgarlik o‘qituvchilarga hujum qilayotgan shaxslar zimmasida. So‘l siyosiy kuchlar, jumladan «Bo‘ysunmas Fransiya» partiyasi namoyishchilarni qo‘llab-quvvatlamoqda. O‘ng qanot siyosatchilar esa prezidentni maktablarda davlat tartibini zaiflashtirishda ayblamoqda.