Elit OCHL. «Paxtakor» Iroqdagi bahsda mag‘lub bo‘ldi

Osiyo Chempionlar ligasi Elit musobaqasining 3-turidan o‘rin olgan uchrashuvda Toshkentning “Paxtakor” jamoasi Iroqning “Eyr Fors” klubiga 0:1 hisobida mag‘lub bo‘ldi. Uchrashuvdagi yagona gol ikkinchi bo‘limda kiritildi.

Bahsni faol boshlagan “Paxtakor” dastlabki daqiqalarda himoyada ishonchli harakat qildi. 14-daqiqada Bashar Resan uzoq masofadan zarba yo‘lladi, ammo to‘p raqib futbolchisiga tegib qaytdi. Bir daqiqa o‘tib, Ayman Hussayn qulay imkoniyatga ega bo‘ldi, biroq undan foydalana olmadi.

17-daqiqada “Paxtakor” penalti tepish huquqiga ega bo‘ldi. Raqib futbolchisi to‘pni qo‘li bilan qaytargani uchun hakam dastlab 11 metrlik nuqtani ko‘rsatdi. Biroq vaziyat VAR orqali ko‘rib chiqilgach, 22-daqiqada penalti bekor qilindi.

Birinchi bo‘limning 38-daqiqasida “Paxtakor” darvozaboni Sanjar Quvvatov raqibning yaqin masofadan bergan kuchli zarbasini qaytarib, jamoasini goldan qutqardi.

Hakam birinchi bo‘limga besh daqiqa qo‘shib berdi. Qo‘shimcha vaqtning uchinchi daqiqasida Ayman Hussayn chap oyoqda kuchli zarba yo‘lladi, ammo to‘p darvozaga aniq borib tushmadi. Jamoalar tanaffusga hisob ochilmagan holda yo‘l olishdi.

Ikkinchi bo‘limning 54-daqiqasida “Paxtakor” hujumchisi Flamarion gol urish uchun yaxshi imkoniyatga ega bo‘ldi, biroq vaziyatdan foydalana olmadi.

70-daqiqada “Eyr Fors” uchrashuvdagi hisobni ochdi — 1:0. Shu tariqa mezbonlar bahsda ustunlikka ega bo‘lishdi.

“Paxtakor” murabbiylar shtabi tomonidan amalga oshirilgan o‘zgarishlar ham jamoaga foyda bermadi. “Paxtakor” hisobni tenglashtira olmadi va uchrashuvdagi mag‘lubiyatni qabul qildi.

Shu tariqa, “Paxtakor” Osiyo Chempionlar ligasi Elit musobaqasining 3-turida “Eyr Fors”ga 0:1 hisobida imkoniyatni boy berdi.

Elit OCHL. G‘arb mintaqasi, 3-tur
“Eyr Fors” — “Paxtakor” — 1:0
Gol: Saad Abdulamir (70)