O‘zbek tiliga davlat tili maqomi berilganiga 36 yil to‘ldi

Bugun, 21 oktyabr kuni, O‘zbek tiliga davlat tili maqomi berilganiga 36 yil to‘ldi. Shu munosabat bilan Prezident butun O‘zbekiston xalqini bayram bilan samimiy tabrikladi.

Davlat rahbari o‘z nutqida sun’iy intellekt texnologiyalarini rivojlantirishda o‘zbek tilining mukammal o‘rganilishi muhim ekanini ta’kidladi:

“Bir narsani bilinglar – sun’iy intellekt dasturlari samarali ishlashi uchun ular, avvalo, o‘zbek tilini mukammal darajada tushunishi zarur”, — dedi Prezident.

Shuningdek, yig‘ilishda o‘zbek tilidagi adabiyotlar, ilmiy ishlar, maqolalar va hisobotlarning ko‘pchiligi hali raqamlashtirilmagani, elektron shakldagilari esa turli manbalarda tarqoq holda saqlanayotgani qayd etildi.

Shu munosabat bilan:

• Vazirlar Mahkamasiga barcha vazirlik va idoralardagi ma’lumotlarni elektron formatga o‘tkazish grafigini tasdiqlash,

• Raqamli texnologiyalar vazirligiga esa **“O‘zbek tili korpusi”**ni yaratish, ya’ni sun’iy intellekt tizimlari milliy madaniyat va qadriyatlarimizni ifoda eta olishi uchun zarur lingvistik baza shakllantirish topshirildi.

Bundan tashqari, 2026 yil yakuniga qadar katta hajmdagi raqamli ma’lumotlarni bir joyga jamlab, ularni qayta ishlash, tahlil qilish va foydalanish imkonini beradigan “Data Lake” platformasini ishga tushirish vazifasi qo‘yildi.

Bu tashabbuslar ona tilimizni raqamli davrda rivojlantirish, uni sun’iy intellekt va global texnologiya jarayonlarida faol ishtirok etadigan tilga aylantirish yo‘lida muhim qadamlardan biri sifatida baholandi.