Bu hafta Ukraina Oliy Radasi yettita qonun loyihasini ko‘rib chiqadi. Mamlakat prezidentining aytishicha, ular «Ukrainaga hamkorlaridan keladigan mablag‘lar»ni anglatadi. Agar Ukraina qonun chiqaruvchilari ushbu qonunlarni qo‘llab-quvvatlasa, Kiyev bir necha milliard AQSh dollari miqdorida yordam olishi mumkin, deb yozdi Vladimir Zelenskiy Telegram’da.
«Bu milliy ahamiyatga ega masalalar. (…) Ushbu choralarning ayrimlari qiyin, yoqimsiz va ommabop bo‘lmasligi mumkin. Ammo hozirgi vaziyatda ularsiz mudofaa ehtiyojlarini qondirish va Ukrainaning tiklanish imkoniyatini ta’minlash mumkin emas», — dedi Ukraina prezidenti.
AFP agentligi eslatishicha, Ukraina byudjeti taqchilligi asosan mudofaa sohasidagi 23 milliard yevrolik mablag‘ yetishmasligi tufayli yuzaga kelgan. Shu bilan birga, Ukraina armiyasini 2027 yil yanvar oyiga tayyorlash uchun 8–10 milliard dollar kerak. Bundan tashqari, harbiy xizmatchilarga maosh to‘lash va halok bo‘lgan harbiylarning oilalariga nafaqalar ajratish uchun yana qariyb 20 milliard dollar zarur.
Avgust oyi oxirida Daniya, Latviya, Litva, Norvegiya, Finlyandiya va Estoniya rahbarlarining Kiyevga tashrifi chog‘ida Vladimir Zelenskiy Yevropa Ittifoqidan 30 milliard yevro olishni kutayotganini aytgan edi. Bu mablag‘ ikki yilga mo‘ljallangan 90 milliard yevrolik kredit doirasida ajratilishi kerak.
O‘sha paytda Ukraina prezidenti ushbu mablag‘larni ajratish «tegishli qonunchilikning qabul qilinishi»ga bog‘liq ekanini ham ta’kidlagan edi.
Zelenskiy Ukraina hududining bir qismidan voz kechishga olib keladigan tinchlik kelishuviga rozi bo‘lishi mumkin
Birgina surat maxfiy rejani tasodifan oshkor qildi. 5 kun ichida nimalar bo‘ldi?
Messi — uchinchi, Yamal — ikkinchi: "Oltin to‘p" uchun asosiy favorit nomi ma’lum bo‘ldi
