Fransiyada ommaviy norozilik namoyishlari: 800 minggacha odam ko‘chaga chiqdi

Fransiyada ta’lim tizimidagi muammolar sabab boshlangan norozilik harakatlari mamlakat miqyosidagi yirik namoyishlarga aylandi. 24 oktyabr, shanba kuni o‘tkazilgan aksiyalarda yuz minglab fuqarolar ishtirok etdi.

Ichki ishlar vazirligi ma’lumotiga ko‘ra, mamlakat bo‘ylab 410 ming kishi ko‘chaga chiqqan. Ularning 110 ming nafari Parijdagi namoyishlarda qatnashgan.

Biroq tashkilotchilar boshqacha raqamlarni keltirmoqda. Kasaba uyushmasi hisob-kitobiga ko‘ra, ishtirokchilar soni 800 ming nafarga yetgan, shundan 250 ming kishi poytaxtda to‘plangan.

Noroziliklar sentyabr oxirida maktab o‘quvchilarining ta’lim muassasalari holati va pedagoglar yetishmasligiga qarshi chiqishlari bilan boshlangan edi.

Keyinchalik harakatga talabalar, kasaba uyushmalari, fermerlar va ekologik faollar ham qo‘shildi. Natijada namoyishchilarning talablari ta’lim sohasidan tashqariga chiqib, ijtimoiy-iqtisodiy masalalarni ham qamrab oldi.

Hozir aksiya ishtirokchilari yashash xarajatlarining ortishi, davlat xizmatlariga mablag‘ yetarli ajratilmayotgani va ta’lim tizimidagi muammolardan norozilik bildirmoqda.