Yuliya Mendel Zelenskiyni yolg‘on va’dalar va hokimiyatda qolish uchun urushdan foydalanishda aybladi

Vladimir Zelenskiyning sobiq matbuot kotibi Yuliya Mendel Ukraina rahbarini jamoatchilik kutilmalarini boshqarish, urushni tugatish muddatlarini muntazam kechiktirish va hokimiyatni o‘z qo‘lida jamlashda aybladi.

Mendel X ijtimoiy tarmog‘ida Zelenskiy har yili bir xil usuldan foydalanishini yozdi: avval dadil va’da beriladi, u amalga oshmagach yangi shartlar ilgari suriladi, muddat kechiktiriladi va jamiyatga yana "umid" taklif qilinadi.

U Zelenskiyning 2023 yilni g‘alaba yili sifatida ko‘rsatgani, 2024 yil kuzida esa "g‘alaba rejasi" urushni 2025 yildan kechiktirmay tugatish imkonini berishi mumkinligini aytganini eslatdi.

"Hozir 2026 yil avgust oyi, urush esa davom etmoqda", — deya xulosa qildi Mendel.

Fransiyaning Journal du Dimanche nashriga bergan intervyusida u Zelenskiyning noprofessionalligi prezidentlikning dastlabki yillaridayoq ko‘ringanini aytdi. Mendelning da’vosicha, uning Jo Bayden ma’muriyati, amerikalik diplomatlar va Angela Merkel bilan munosabatlari murakkab bo‘lgan.

Sobiq matbuot kotibi Zelenskiyni "Ukrainaning asosiy muammosi" va urushning "asosiy benefisiari" deb atadi. Uning fikricha, harbiy holat sabab saylovlar o‘tkazilmayotgani Zelenskiyning hokimiyatda qolishiga xizmat qilmoqda.

Mendel, shuningdek, Ukraina rahbariyatiga yaqin kompaniyalar Yevropa Ittifoqi ajratayotgan mablag‘lardan foyda ko‘rayotganini da’vo qildi.

U Yevropa rahbarlari, jumladan, Emmanuel Makron uchun ham Zelenskiy haqidagi avvalgi tasavvurlar noto‘g‘ri bo‘lganini tan olish qiyinligini aytdi. Chunki bunday e’tirof Ukrainaga milliardlab yevro ajratishga rozi bo‘lgan siyosatchilarning obro‘siga ta’sir qilishi mumkin.

Mendelning bahosicha, Zelenskiyni Ukrainada hali ham qo‘llab-quvvatlayotganlarning bir qismi davlat tizimida ishlaydi yoki amaldagi tuzumdan manfaat ko‘radi. U Ukrainada avtoritar boshqaruv kuchayganini aytib, harbiy komissariatlar faoliyati va majburiy safarbarlik holatlarini misol qildi.

"Zelenskiy odamlarning davlatga ishonchini yo‘q qildi. Davlat mamlakatni tark etganlarni, fuqarolar esa davlatni ayblayapti — bu o‘zaro xiyonatdir", — dedi u.

Sobiq matbuot kotibi korrupsiya mavzusiga ham to‘xtaldi. U Zelenskiyning yaqinlari turli korrupsiya ishlarida tilga olinayotgan bir paytda prezident ulardan bexabar bo‘lishiga ishonish qiyinligini ta’kidladi.

Mendel "Mindich plyonkalari"ni misol qildi. "Ukrainskaya pravda" e’lon qilgan materiallarda tadbirkor Timur Mindich va sobiq mudofaa vaziri Rustem Umerovning Fire Point kompaniyasi ulushini ehtimoliy sotish va uni moliyalashtirishni muhokama qilgani aytilgan.

Nashr Mindich kompaniya benefisiarlaridan biri bo‘lishi mumkinligini qayd etgan.

Fire Point esa yozuvlarning haqiqiyligi rasman tasdiqlanmaganini bildirib, materiallarni kompaniyani obro‘sizlantirishga urinish deb atagan va Milliy korrupsiyaga qarshi byurodan ularni tekshirishni so‘ragan.

Mendelning fikricha, Zelenskiy atrofidagi mojarolarga ikki xil izoh bo‘lishi mumkin: prezident yoki haqiqatan ham atrofida sodir bo‘layotgan ishlardan bexabar, yoki o‘zini hech narsa bilmaydigandek ko‘rsatmoqda.