O‘zbekistonda elektromobil quvvatlash stansiyalari soni 1400 taga yetdi

1 may holatiga, O‘zbekistonda elektromobillarni quvvatlash stansiyalari soni 1399 taga etdi. Bu – bir yil oldingidan 2,5 barobarga ko‘p. Bu haqda Iqtisodiyot va moliya vazirligiga tayanib Kunuz xabar bermoqda.

Quvvatlash stansiyalarining 820 tasi yoki 59 foizi Toshkent shahrida joylashgan. Toshkent viloyatida 154 ta stansiya mavjud.

Namanganda 70 ta, Samarqandda 67 ta, Jizzaxda 50 ta quvvatlash stansiyasi bor. Bunday nuqtalarning soni Farg‘onada 43 ta, Buxoroda 39 ta, Qashqadaryoda 32 ta, Surxondaryoda 27 ta, Andijonda 26 ta, Navoiyda 23 ta, Xorazmda 21 ta, Qoraqalpog‘istonda 14 ta, Sirdaryodda 13 tani tashkil etadi.

Respublika bo‘ylab elektromobillarni quvvatlash stansiyalaridan 92 ming kishi foydalanamoqda.

Hukumatning o‘tgan yil noyabrdagi qarorida, 2025 yilda 21 548 ta quvvatlash stansiyalarini o‘rnatish ko‘zda tutilgan.