Ummon tashqi ishlar vaziri Badr al-Busaidiy Fors ko‘rfazi davlatlari o‘rtasida hujum qilmaslik paktini tuzish tashabbusini ilgari surdi. Bu haqda Ummon TIV matbuot xizmati xabar berdi.
Vazir Kembrij universitetidagi chiqishida mintaqaviy xavfsizlikni ta’minlash uchun sakkiz davlat ishtirokida yangi muloqot boshlash zarurligini bildirdi.
Tashabbus Bahrayn, Qatar, Kuvayt, Saudiya Arabistoni, Birlashgan Arab Amirliklari, Ummon, Iroq va Eronni qamrab oladi.
Al-Busaidiyning ta’kidlashicha, Eronni chetda qoldirgan holda Fors ko‘rfazida barqaror xavfsizlik tizimini yaratish imkonsiz.
Vazir mintaqada xavfsizlik masalalarining uzoq vaqt tashqi kuchlarga bog‘liq bo‘lib qolganini tanqid qildi. Uning fikricha, davlatlar o‘z xavfsizligi uchun asosiy mas’uliyatni o‘z zimmasiga olishi, tashqi hamkorlik esa ko‘proq iqtisodiyot va investisiyalarga yo‘naltirilishi kerak.
Shu munosabat bilan u 1976 yil noyabrda Maskatda o‘tkazilgan uchrashuvni esladi. O‘shanda sakkiz davlat tashqi ishlar vazirlari umumiy xavfsizlik tizimini muhokama qilgan, ammo tashabbus davom ettirilmagan.
Ummon ushbu muloqotni qayta tiklashni va Ho‘rmuz bo‘g‘ozi orqali kemalarning xavfsiz harakatlanishini ham muhokama qilishni taklif etmoqda.
Al-Busaidiy Ummon va Eron o‘rtasida Ho‘rmuz bo‘g‘ozida kema qatnovini tiklash bo‘yicha vaqtinchalik kelishuv asoslari ishlab chiqilganini ham ma’lum qildi. Biroq uni amalga oshirish uchun Eron va AQSh o‘zaro murosaga kelishi zarur.
Sun’iy intellekt dunyodagi eng qimmat surat muallifligini shubha ostiga qo‘ydi
O‘zbekiston Samarqand haqidagi bayonotlar sabab Eronga norozilik notasi topshirdi
Dunyodagi eng yirik yo‘lovchi samolyoti Moskvaga qo‘na olmayapti — OAV
