Finlyandiya prezidenti Aleksandr Stubb, Norvegiya bosh vaziri Yonas Gar Styore va Rossiya prezidenti Vladimir Putin telefon orqali muloqot qilib, Ukrainadagi urushni tugatishga qaratilgan diplomatik sa’y-harakatlar va muzokaralarni qayta boshlash masalalarini muhokama qildi.
Bu haqda Finlyandiya prezidentining rasmiy veb-saytida ma’lum qilingan.
Telefon orqali suhbat 20 oktyabr kuni Osloda ikki davlat rahbari o‘rtasida bo‘lib o‘tgan uchrashuvning davomi bo‘ldi. Muloqot Ukraina bilan kelishilgan holda o‘tkazildi. Suhbatdan maqsad — urushni tugatishga xizmat qilishi mumkin bo‘lgan kelgusi muzokaralarga oid xabarlarni Putinga bevosita yetkazishdan iborat bo‘lgan.
Stubb va Styore Finlyandiya hamda Norvegiya Ukrainani qo‘llab-quvvatlashda davom etishini ta’kidladi. Shuningdek, ular urushni yakunlash va muzokaralarni qayta boshlash zarurligini bildirdi.
«Suhbat ochiq va mazmunli bo‘ldi. Biz Rossiya bilan qo‘shni davlatlarmiz. Bu urushning natijasi bizning xavfsizligimizga, shuningdek, butun Yevropaning xavfsizligiga bevosita ta’sir ko‘rsatadi. Urushni tugatish uchun to‘g‘ridan-to‘g‘ri muzokaralar zarur», — dedi Stubb.
O‘z navbatida, Styore urush ulkan inson hayoti va moddiy yo‘qotishlarga sabab bo‘layotganini qayd etdi.
Tomonlar, shuningdek, Boltiqbo‘yi mintaqasi va Arktika hududida barqarorlik hamda oldindan bashorat qilish mumkin bo‘lgan vaziyatni ta’minlash Finlyandiya va Norvegiyaning umumiy manfaatlariga mos kelishini ta’kidladi.
Shu bilan birga, rasmiy xabarda Stubb va Styore mazkur suhbatda faqat o‘z mamlakatlari rahbarlari sifatida ishtirok etgani, butun Yevropa nomidan ish ko‘rmagani qayd etilgan.
Zelenskiy Ukraina hududining bir qismidan voz kechishga olib keladigan tinchlik kelishuviga rozi bo‘lishi mumkin
Sun’iy intellekt dunyodagi eng qimmat surat muallifligini shubha ostiga qo‘ydi
O‘zbekiston Samarqand haqidagi bayonotlar sabab Eronga norozilik notasi topshirdi
