Kechasi Sankt-Peterburg va Leningrad viloyati Ukraina dronlari hujumiga uchradi. Leningrad viloyati gubernatori Aleksandr Drozdenko ma’lum qilishicha, viloyat osmonida 59 ta uchuvchisiz uchish apparati urib tushirilgan.
Hujumning eng muhim nishonlaridan biri Sankt-Peterburg neft terminali bo‘lgan. Bu hujumni Ukraina prezidenti Vladimir Zelenskiy tasdiqlagan.
Neft terminali Boltiq mintaqasidagi eng yirik suyuq yuk terminallaridan biri hisoblanadi. Uning hududi 37 gektarni tashkil etadi va yillik o‘tkazish quvvati 12,5 million tonnadan oshadi.
Sankt-Peterburgning turli tumanlarida tun davomida portlash ovozlari eshitilgan. Shahar markazi va qirg‘oq bo‘yi hududlaridan neft terminali tomonida qora tutun ko‘tarilgani kuzatilgan.
Shahar gubernatori Aleksandr Beglov ma’lumotiga ko‘ra, Kronshtadt, Kirovskiy va Krasnoselskiy tumanlaridagi infratuzilma ob’ektlari nishonga olingan. Bir necha kishi jarohatlangan, ammo halok bo‘lganlar haqida ma’lumot berilmagan.
Dron parchalari Leningrad viloyatining Luga tumanidagi to‘rtta xususiy uyga ham zarar yetkazgan.
Hujum oqibatida Pulkovo aeroporti qariyb besh soat faoliyatini to‘xtatdi. Qator reyslar kechiktirildi yoki boshqa aeroportlarga yo‘naltirildi. Shuningdek, shaharning bir qismida mobil internet aloqasida uzilishlar kuzatildi.
Mahalliy nashrlar ma’lumotiga ko‘ra, ayrim turar-joy binolariga dron yoki uning bo‘laklari teggan bo‘lishi mumkin. Guvohlar dronlarning binolar orasida past balandlikda uchganini, aholi esa yerosti avtoturargohlari va boshqa xavfsiz joylarga yashiringanini bildirgan. Ayrim aholi tun bo‘yi kuchli portlashlar va titrashlarni his qilganini aytgan.
O‘zbekistonda yangi ko‘l paydo bo‘ldi
Qirg‘izistonga yuborilgan 21 tonna tarvuz nega ortga qaytarildi?
"EIning barcha davlatlari bu mavzuda ovozini o‘chirishi kerak"
