Tramp Los-Anjeles yoki San-Diyegoni yo‘q qilinishiga rozidek

AQSh prezidenti Donald Tramp Eron bilan urush yuzaga kelgan taqdirda, mamlakat Amerika shaharlaridan birini, jumladan Los-Anjeles yoki San-Diyegoni yo‘q qilishi mumkinligini aytdi. Uning bu bayonoti Kaliforniya rahbariyati va Demokratik partiya vakillarining keskin munosabatiga sabab bo‘ldi.

Tramp Nebraskada tarafdorlari bilan uchrashuvda so‘zlar ekan, urushning iqtisodiy oqibatlari, xususan, yoqilg‘i, o‘g‘it va boshqa mahsulotlar narxining oshishi haqida gapirdi. Uning ta’kidlashicha, AQSh xavfsizligini ta’minlash uchun bunday iqtisodiy xarajatlarni qabul qilishga to‘g‘ri kelishi mumkin.

«Yana bir bor eslatib o‘taman: urush sababli bularning barchasi sun’iy ravishda yuzaga kelmoqda, narxlar biroz oshgan. Bu to‘lash kerak bo‘lgan kichik narx. Tinchlik va mamlakatimiz xavfsizligini ta’minlash uchun bu juda kichik narx. Ular biror shaharni yo‘q qilishi mumkin. Los-Anjelesni yo‘q qilishsin, San-Diyegoni yo‘q qilishsin. Bu juda kichik narx va bularning barchasi tez orada yakunlanadi», — dedi Tramp.

Kaliforniya gubernatori Gevin Nyusom Trampning bayonotiga keskin munosabat bildirib, uning so‘zlarini «xavfli» deb atadi. Los-Anjeles meri Karen Bass esa bunday bayonotlar shahar xavfsizligiga tahdidlar haqidagi xavotirlarni kuchaytirishi mumkinligini ta’kidladi.

San-Diyego hududidan saylangan demokratik kongressmen Sara Jeykobs esa uning saylovchilari, jumladan harbiy xizmatchilar, faxriylar va ularning oilalari «qabul qilinadigan yo‘qotishlar» sifatida ko‘rilmasligi kerakligini bildirdi.

Oq uy vakillari esa Trampning so‘zlari noto‘g‘ri talqin qilinganini ma’lum qildi. Ularning tushuntirishicha, prezident Eron tomonidan AQSh hududiga ehtimoliy yadroviy zarba berilishining oldini olish zarurligini nazarda tutgan.