Tata Steel Chess–2026. Nodirbek Abdusattorov va Javohir Sindorov o‘rtasidagi bahsda durang qayd etildi

Niderlandiyaning Veyk-an-Zee shahrida shaxmat bo‘yicha 2026-yilgi Tata Steel Chess turniri davom etmoqda. Ushbu nufuzli musobaqaning umumiy sovrin jamg‘armasi 1,2 million AQSh dollarini tashkil etadi.

Chempionatning Masters guruhi 9-tur o‘zbekistonlik grossmeysterlar — Nodirbek Abdusattorov va Javohir Sindorov o‘zaro bahs olib bordi. Qiziqarli kechgan bahsda tomonlar o‘rtasidagi bellashuvda durang qayd etildi. Ushbu natijadan so‘ng Abdusattorov 6 ochko turnir jadvalida 1-o‘rinda qolmoqda. Sindorov esa 5,5 ochko bilan 2-pog‘onani band etgan.

Abdusattorov 1-turda qora donalarda turkiyalik Yag‘iz Kan Erdog‘mus bilan durang qayd etgan bo‘lsa, 2-turda hindistonlik Praggnanandha Rameshbabu ustidan g‘alaba qozongan. 3-turda yana bir Hindiston vakili Aravindh Chitambaram bilan durang o‘ynagan va 4-turda oq donalarda Chexiya vakili Nguyen Tai Dai Vanni mag‘lub etgan. O‘zbekistonlik shaxmatchi 5-turda qora donalarda AQSh vakili Hans Niemann bilan durangga imzo chekdi, 6-turda amaldagi Jahon chempioni Gukesh Dommaraju, 7-turda esa Germaniyalik Vinsent Keymerni mag‘lub etdi. Biroq Nodirbek 8-turda niderlandiyalik Anish Giriga imkoniyatni boy berdi.

Sindorov 1-turda amaldagi Jahon chempioni, hindistonlik Gukesh Dommaraju bilan oq donalarda, 2-turda niderlandiyalik Anish Giriga qarshi qora donalarda, 3-turda sloveniyalik Vladimir Fedoseev bilan oq donalarda durang qayd etgan, 4-turda esa u qora donalarda germaniyalik Matias Bleubaum, 5-turda oq donalarda turkiyalik Yag‘is Kaan Erdog‘mus ustidan g‘alaba qozongan edi. O‘zbekistonlik shaxmatchi 6-turda hindistonlik Aravindh Chitambaram, 7-turda AQSh vakili Hans Niemann, 8-turda esa germaniyalik Vinsent Keymer bilan durang o‘ynadi.

Nodirbek Abdusattorov 10-turda sloveniyalik Vladimir Fedoseevga qarshi dona suradi. Javohir Sindorov esa niderlandiyalik Jorden van Forest bilan o‘ynaydi. Ushbu bellashuvlar 28 yanvar sanasiga belgilangan.