Si Szinpin 2026 yilda AQShga davlat tashrifi bilan boradi

AQSh prezidenti Donald Tramp Xitoy rahbari Si Szinpin 2026 yilda AQShga davlat tashrifi bilan borishini tasdiqladi. U bu haqda Xitoy rahbari bilan telefon orqali suhbatdan so‘ng ma’lum qildi.

Trampning so‘zlariga ko‘ra, suhbat "juda yaxshi o‘tdi" va keng ko‘lamli masalalarni qamrab oldi.

— Biz Ukraina/Rossiya, fentanil, soya va boshqa qishloq xo‘jaligi mahsulotlari kabi bir qator mavzularni muhokama qildik. Biz buyuk fermerlarimiz uchun yaxshi va juda muhim kelishuvga erishdik — va ishlar faqat yaxshilanadi, — deb yozdi u Truth Social ijtimoiy tarmog‘ida.

Tramp ikki mamlakat o‘rtasidagi munosabatlar ijobiy yo‘nalishda rivojlanayotganini ta’kidladi. Shuningdek, u suhbat "uch hafta oldin Janubiy Koreyada bo‘lib o‘tgan juda muvaffaqiyatli uchrashuvning davomi" ekanligini eslatdi.

Amerika rahbari o‘shandan beri "ikkala tomon ham kelishuvlarning dolzarbligi va aniqligini saqlashda sezilarli yutuqlarga erishdilar" deb ta’kidladi.

— Prezident Si meni aprel oyida Pekinga taklif qildi va men taklifni qabul qildim. O‘z navbatida, men uni keyinroq Qo‘shma Shtatlarga davlat tashrifi bilan borishga taklif qildim. Biz muntazam aloqalarni saqlab qolish muhimligi haqida kelishib oldik va men buni intiqlik bilan kutaman, — deb yozdi Tramp.