Samarqand shahrida o‘tkazilayotgan 46-Butunjahon shaxmat olimpiadasining 1-tur uchrashuvlari yakunlandi. O‘zbekiston nomidan qatnashayotgan uchta erkaklar va uchta ayollar jamoasining barchasi musobaqani g‘alaba bilan boshladi.
Erkaklar o‘rtasida O‘zbekiston-1 Yamaykani 4:0 hisobida mag‘lub etdi. Nodirbek Abdusattorov, Nodirbek Yoqubboyev, Shamsiddin Vohidov va Muhiddin Madaminov o‘z partiyalarida g‘alaba qozondi.
O‘zbekiston-2 Afg‘onistondan 3:1 hisobida ustun keldi. Abdumalik Abdisalimov, Muhammadzohid Suyarov va Ortiq Nig‘matov jamoaga ochko keltirgan bo‘lsa, Humoyun Begmurotov o‘z partiyasida mag‘lubiyatga uchradi.
O‘zbekiston-3 esa Malini 3,5:0,5 hisobida yengdi. Almas Rahmatullayev, Muhammadali Abdurahmonov va Asrorjon Omonov g‘alaba qozondi, Saidakbar Saydaliyev esa Bakari Traore bilan durang o‘ynadi.
Ayollar bahsida ham O‘zbekiston jamoalari muvaffaqiyatli start oldi. O‘zbekiston-1 Trinidad va Tobagoni 4:0 hisobida mag‘lub etdi. Gulruhbegim Tohirjonova, Umida Omonova, Nilufarxon Imomqo‘ziyeva va Guldona Karimova o‘z partiyalarini g‘alaba bilan yakunladi.
O‘zbekiston-2 Togoni 3:1 hisobida taslim etdi. Marjona Malikova mag‘lub bo‘lgan bo‘lsa, Madinabonu Halilova, Asal Salimova va Mumtozbegim Mansurova g‘alaba qozondi.
O‘zbekiston-3 esa Tanzaniya ustidan 4:0 hisobida ishonchli zafar quchdi. Zilola Aktamova, Maftuna Bobomurodova, Shohina Ahmedova va Barchinoy Shokirjonova raqiblarini mag‘lub etdi.
Shu tariqa, O‘zbekistonning shaxmat olimpiadasida ishtirok etayotgan barcha 6 jamoasi birinchi turni g‘alaba bilan yakunladi.
Ma’lumot uchun, Samarqand mezbonlik qilayotgan 46-Butunjahon shaxmat olimpiadasida jami 400 ta jamoa — erkaklar o‘rtasida 208 ta, ayollar bahsida 192 ta jamoa ishtirok etmoqda. Musobaqa 16–27 sentyabr kunlari bo‘lib o‘tadi.
Rossiya terma jamoasi sobiq futbolchisi O‘zbekistonni Nigeriyaga tenglashtirdi
«Oltin to‘p» g‘olibi nomi marosimdan oldin oshkor bo‘ldimi?
Messi — uchinchi, Yamal — ikkinchi: "Oltin to‘p" uchun asosiy favorit nomi ma’lum bo‘ldi
