Rossiya Ukrainaga qurol-yarog‘ va harbiy texnologiyalar yetkazib berayotgan mudofaa kompaniyalarida rahbarlik lavozimlarini egallab kelayotgan Buyuk Britaniyaning yetti nafar fuqarosiga nisbatan sanksiyalar joriy etdi.
Bu haqda Rossiya Tashqi ishlar vazirligi bayonotida ma’lum qilmoqda.
Vazirlikda ta’kidlanishicha, mazkur qaror Londonning Rossiyaga qarshi siyosati va Ukrainaga qurol-yarog‘ yetkazib berish hajmini oshirishiga javoban qabul qilingan.
Sanksiyalar ro‘yxatiga Rotron Aerospace kompaniyasi bosh direktori Aleks Edvard Xed, kompaniyaning bosh harbiy maslahatchisi Kev Oliver hamda direktorlar kengashi raisi Jorj Zambellas kiritilgan.
Shuningdek, cheklovlar MGI Engineering kompaniyasi bosh direktori Robert Maykl Gaskoyn, Malloy Aeronautics ijrochi direktori Nil Eplton, Tekever UK kompaniyasi direktori va hammuassisi Pol Uebb hamda BAE Systems kompaniyasining texnologiyalar va axborot bo‘limi rahbari Julian Frederik Charlz Kreknellga nisbatan ham qo‘llanilgan.
Rossiya Tashqi ishlar vazirligi ma’lum qilishicha, Britaniya kompaniyalari Ukrainaga yetkazib berilayotgan uzoq masofaga uchuvchi raketalar, uchuvchisiz uchish apparatlari va boshqa harbiy texnologiyalarni ishlab chiqish hamda ishlab chiqarishda ishtirok etmoqda.
Vazirlik, shuningdek, Britaniya rasmiylarining xatti-harakatlariga javoban sanksiyalar ro‘yxatini kengaytirish bo‘yicha ishlar davom ettirilishini bildirgan.
Sun’iy intellekt dunyodagi eng qimmat surat muallifligini shubha ostiga qo‘ydi
O‘zbekiston Samarqand haqidagi bayonotlar sabab Eronga norozilik notasi topshirdi
Dunyodagi eng yirik yo‘lovchi samolyoti Moskvaga qo‘na olmayapti — OAV
