Ronaldu terma jamoadagi faoliyatini yakunlayotgani haqida Jezushga xabar bermagan: futbolchining qarori murabbiyni kutilmaganda hayratda qoldirdi

Hujumchi Krishtianu Ronaldu Portugaliya terma jamoasidagi faoliyatini yakunlayotganini milliy jamoa bosh murabbiyi Jorje Jezushni xabardor qilmasdan e’lon qilgan.

A Bola nashri xabar berishicha, futbolchi qabul qilgan qarori haqida Portugaliya futbol federasiyasi prezidenti Pedru Proensaga ma’lum qilgan, biroq 30 sentyabrdan beri muloqot qilmayotgan Jezushni bu haqda ogohlantirmagan.

Ma’lum qilinishicha, Krishtianu Jezush qo‘l ostida boshqa o‘ynashni istamagan va Millatlar ligasi o‘yinlari uchun terma jamoa tarkibi e’lon qilinishidan oldin o‘z qarorini bildirgan. Bu orqali u jamoaga chaqirilmaslikni maqsad qilgan. Ayni paytda Jezush Ronalduni terma jamoaga chaqirishni rejalashtirgan edi. Shu sababli hujumchining qarori murabbiy uchun kutilmagan hol bo‘lgan.

Shu bilan birga, Actu Foot nashrining yozishicha, Jezush milliy jamoa mashg‘ulotlar zalida Ronalduning suratini yosh futbolchilar uchun namuna sifatida joylashtirganini aytgan.

«Krishtianu — Portugaliya va terma jamoa uchun o‘ziga xos namuna. Barcha yosh futbolchilar har kuni ko‘z oldida shu namuna bo‘lishini istab, uning katta suratini mashg‘ulotlar zalimizga osib qo‘ydim. Men undan men bilan faoliyatini davom ettirishni so‘radim, chunki bu men uchun muhim edi. Ammo uning qarorini qabul qilishim kerak. U portugaliyaliklar qalbida abadiy qoladi», — deya mutaxassisning so‘zlarini keltiradi nashr.

41 yoshli Krishtianu Ronaldu Portugaliya terma jamoasidagi debyutini 2003 yil 20 avgust kuni, 18 yoshida Qozog‘iston terma jamoasiga qarshi o‘rtoqlik uchrashuvida (1:0) o‘tkazgan. U o‘yinning ikkinchi bo‘limida zaxiradan maydonga tushgan.

Hujumchi Portugaliya terma jamoasi safida jami 234 ta o‘yinda maydonga tushib, 146 ta gol va 45 ta golli uzatmani amalga oshirgan. Ronaldu 2016 yilda Yevropa chempioni, shuningdek, UYEFA Millatlar ligasining ikki karra g‘olibi (2018/2019 va 2024/2025 yillar mavsumlari) bo‘lgan.