Nigeriya poytaxti Abudja shahrida Ugandadan samolyotda kelgan ayolda Ebola virusi aniqlandi. Bu haqda mamlakat Sog‘liqni saqlash vazirligi ma’lum qildi. Bemor shifoxonaga yotqizilgan, virus bilan aloqada bo‘lgan bo‘lishi mumkin bo‘lgan 44 kishi kuzatuvga olingan.
Uganda Sog‘liqni saqlash vazirligi ma’lumotiga ko‘ra, Nigeriya fuqarosi mamlakat hududidan faqat tranzit orqali o‘tgan. U bunga qadar Kongo Demokratik Respublikasining sharqiy qismida bo‘lgan. Avvalroq Ugandada Ebola bilan kasallanish holatlari qayd etilgan bo‘lsa-da, keyinchalik mamlakatda faol holatlar qolmagani e’lon qilingan.
Kongo Demokratik Respublikasida Ebola epidemiyasi may oyidan beri davom etmoqda. Sentyabr o‘rtasidagi ma’lumotlarga ko‘ra, mamlakatda 7 mingdan ortiq zararlanish holati tasdiqlangan, 3 300 dan ziyod kishi vafot etgan.
Avgust oyi oxirida Kongo Demokratik Respublikasiga Ervebo vaksinasining ilk partiyasi etkazilgan. Jahon sog‘liqni saqlash tashkiloti ushbu vaksina virusning tarqalayotgan shtammiga qarshi himoya berishiga umid qilmoqda.
Ebola virusi og‘ir gemorragik isitmani keltirib chiqaradi. Bundibugio shtammi bilan kasallanganlarda o‘lim darajasi 50 foizgacha etishi mumkin. Hozircha ushbu shtammga qarshi tasdiqlangan davolash usullari va vaksinalar mavjud emas.
Kongo Demokratik Respublikasida hukumat kuchlari va isyonchilar o‘rtasidagi qurolli mojaro virus tarqalishining oldini olish bo‘yicha sa’y-harakatlarni qiyinlashtirmoqda.
Sun’iy intellekt dunyodagi eng qimmat surat muallifligini shubha ostiga qo‘ydi
O‘zbekiston Samarqand haqidagi bayonotlar sabab Eronga norozilik notasi topshirdi
Dunyodagi eng yirik yo‘lovchi samolyoti Moskvaga qo‘na olmayapti — OAV
