Isroil Bosh vaziri Binyamin Netanyahu so‘nggi vaqtlarda Rossiya va Isroil manfaatlari bir necha bor to‘qnash kelganini ma’lum qildi. U bu haqda 18 oktyabr kuni Isroil milliy xavfsizlik doktrinasi taqdimotida The Jerusalem Post nashri savoliga javob berar ekan, aytdi.

«Rossiyaning o‘z manfaatlari bor, Isroil davlatining esa o‘z manfaatlari mavjud. Ular har doim ham bir-biriga mos kelavermaydi. Ba’zan hatto to‘qnash keladi», — dedi Netanyahu.

Uning so‘zlariga ko‘ra, ikki tomon umumiy manfaatlarni ro‘yobga chiqarishga intiladi, biroq kelishmovchiliklar yuzaga kelganda har biri o‘z pozisiyasini himoya qiladi.

Netanyahu, shuningdek, Moskva va Tehron o‘rtasidagi hamkorlikni tanqid qildi hamda Rossiyani Isroilga qarshi antisemitik xabarlarni tarqatuvchi botlar tarmoqlarini qo‘llab-quvvatlashda aybladi.

Shu bilan birga, u har ikki mamlakat Eronning yadroviy qurolga ega bo‘lishiga yo‘l qo‘ymaslikdan manfaatdor ekanini ta’kidladi.

Isroil bosh vazirining qo‘shimcha qilishicha, u zaruratga qarab Rossiya Prezidenti Vladimir Putin bilan aloqalarni saqlab kelmoqda.