Makron ommaviy tartibsizliklar yuzasidan bayonot berdi

Makron hukumatdan tartibsizliklar takrorlanmasligi uchun choralar ko‘rishni talab qildi.

Fransiya prezidenti Emmanuel Makron mamlakatda ko‘cha tartibsizliklari takrorlanmasligi uchun hukumatdan zarur choralarni ko‘rishni talab qilganini ma’lum qildi.

«Hukumatdan razvedka ma’lumotlarini to‘plash va bunday voqealarni oldindan prognoz qilish masalalari bo‘yicha barcha zarur xulosalarni chiqarishni, shuningdek, bunday holatlar boshqa takrorlanmasligi uchun choralar ko‘rishni talab qildim», — dedi Makron BFMTV telekanali orqali namoyish etilgan xalqqa murojaatida.

Fransiya rahbari aniq javoblarni kutayotganini ham ta’kidladi.

Bir kun avval Fransiyaning butun hududida keng ko‘lamli namoyishlar bo‘lib o‘tdi. Bir necha haftadan beri norozilik namoyishlarida qatnashib kelayotgan yuqori sinf o‘quvchilari va talabalarga o‘ta so‘l faollar, «sariq nimchalar» harakati tarafdorlari, taksichilar, hamshiralar, quruvchilar va kasaba uyushmalari vakillari qo‘shildi.

Namoyishchilar turmush qiymatining oshishi va narxlarning ko‘tarilishiga norozilik bildirib, ko‘chalarga chiqdi. Qatnashchilarning umumiy soni 550 ming kishiga yetdi.

Namoyishlar polisiya bilan keskin to‘qnashuvlar, ommaviy tartibsizliklar, talon-toroj va vandalizm holatlari bilan kechdi. Radikal kayfiyatdagi yoshlar do‘konlarni vayron qildi va o‘t qo‘yish holatlarini sodir etdi.

Tartibni tiklash uchun huquqni muhofaza qiluvchi organlar ko‘zdan yosh oqizuvchi gaz, shovqinli granatalar va suv purkagichlardan foydalandi.

Hodisalar davomida ikki mingdan ortiq kishi qo‘lga olindi. 600 nafardan ziyod huquqni muhofaza qiluvchi organlar xodimlari va o‘t o‘chiruvchilar jarohat oldi.