AQSh Ukrainani Rossiyaga taslim bo‘lishga majburlamoqchi – Zelenskiy

Ukraina prezidenti Vladimir Zelenskiy AQSh prezidenti Donald Tramp ma’muriyati Kiyevni Rossiyaga taslim bo‘lishga undayotganini bildirdi.

«Menimcha, Ukrainani taslim bo‘lishga ko‘ndirish uchun muayyan qadamlar tashlandi. Amerikalik hamkorlarimiz urushni Ukraina hisobidan tezroq tugatish mumkin deb o‘ylayotganiga ishonishni istamayman. Ammo vaziyat shunday ko‘rinyapti», — dedi Zelenskiy Bloomberg nashriga bergan intervyusida.

Uning so‘zlariga ko‘ra, Vashington Ukrainadan Rossiya neftni qayta ishlash zavodlariga zarbalarni to‘xtatishni talab qilyapti. Kiyev esa buning evaziga Patriot havo mudofaasi tizimlari uchun qo‘shimcha raketalar so‘ragan, biroq AQSh taklifni qabul qilmagan.

Zelenskiy, shuningdek, AQSh Patriot raketalarini yetkazib berishni kechiktirayotgani va Ukrainada Starlink interneti tezligini ataylab cheklaganini iddao qildi.

O‘z navbatida, Tramp Zelenskiyni urushni tugatishni istamayotganlikda aybladi. Ukraina rahbari esa AQShdagi 3 noyabr saylovlaridan keyin ikki mamlakat munosabatlari yaxshilanishiga umid bildirmoqda.