Mask: "AQShning keyingi prezidenti Vens bo‘ladi"

Ilon Mask sobiq hamkasblariga AQShning amaldagi vise-prezidenti Djey Di Vens Oq uyning navbatdagi amaldori bo‘lishiga ishonishini aytdi.

Bu haqda Amerikaning Politico gazetasi xabar bermoqda.

O‘z manbalariga ko‘ra, Mask bu ishonchini 22 noyabr kuni AQSh Hukumat samaradorligi bo‘yicha idorasi (DOGE) xodimlariga videokonferensiya murojaatida bildirgan. Mask avvalroq 2025 yilda bir necha oy davomida DOGE ishini nazorat qilgan va maxsus maqomga ega AQSh xodimi bo‘lib, pro bono ishlagan. U amalda AQShning amaldagi prezidenti Donald Trampning yaqin doirasi a’zosi edi.

Ommaviy efirga uzatilmagan nutqida Mask AQSh "buyuk 12 yillik davr"ning boshida turganini ta’kidladi.

Gazetaning aniqlik kiritishicha, bu Trampning joriy to‘rt yillik prezidentlik muddatiga, shuningdek, Vensning keyingi ikki muddatga tegishli. Gazetaning yozishicha, Mask Vens bilan yaxshi munosabatda bo‘lgan. AQShda navbatdagi prezidentlik saylovlari 2028 yilda bo‘lib o‘tadi. Vens hozircha o‘z nomzodini qo‘yish rejasini aniq e’lon qilgani yo‘q. Trampga qonuniy ravishda bunday qilish taqiqlangan, chunki uning amaldagi prezidentlik muddati allaqachon ikkinchi. AQSh Konstitusiyasiga kiritilgan 22-tuzatish prezidentni ikki muddat prezidentlik qilish bilan cheklaydi.

Mask, shuningdek, u Tramp va Vens bilan birga AQShdagi "asosiy suiqasd nishonlari"dan biri ekanligiga ishonch bildirdi.