«Manchester Siti» o‘z himoyachisini jamoadan ketishini e’lon qildi

Angliyaning «Manchester Siti» klubi tajribali himoyachi Jon Stounz joriy mavsum yakunlangach, jamoa bilan xayrlashishini rasman e’lon qildi.

31 yoshli futbolchi «shaharliklar» safidagi 10 yillik muvaffaqiyatli faoliyatiga nuqta qo‘ymoqda.

Jon Stounz «Manchester Siti» tarkibiga 2016 yilda kelib qo‘shilgan edi. Shu vaqt ichida u jamoa libosida 293 ta uchrashuvda maydonga tushib, «shaharliklar»ning eng zafarli davriga ulkan hissa qo‘shdi.

Himoyachi Manchester klubi bilan birgalikda jami 19 ta sovrinni qo‘lga kiritdi. Ular orasida 6 ta APL chempionligi va tarixiy Yevropa Chempionlar ligasi kubogi bor.