"Manchester Siti" futbolchilarining agentlari klub moliyaviy qoidalarni buzganlikda aybdor deb topilib, quyi divizionga tushirilgan taqdirda shartnomalarni bekor qilish imkonini beradigan asoslarni izlamoqda. Bu haqda Daily Mail xabar berdi.
Manba ma’lumotiga ko‘ra, futbolchilarning hech bir shartnomasida jamoa quyi ligaga tushirilgan taqdirda kelishuvni bir tomonlama bekor qilish imkonini beruvchi maxsus band mavjud emas.
Odatda "Manchester Siti" futbolchilarining shartnomalari uch qismdan iborat: asosiy maosh, Chempionlar ligasida ishtirok etish uchun bonus va mavsum davomida maydonda o‘tkazilgan vaqt foiziga bog‘liq qo‘shimcha to‘lovlar.
"Siti"ning so‘nggi yillardagi barqaror muvaffaqiyatlari hisobga olinsa, mazkur bonuslar amalda futbolchilar daromadining deyarli kafolatlangan qismiga aylangan.
Qayd etilishicha, ayrim futbolchilarda asosiy maosh umumiy daromadning atigi 60 foizini tashkil etadi, qolgan salmoqli qism esa turli bonuslar hisobiga to‘g‘ri keladi.
Maydonda o‘tkazilgan vaqt uchun beriladigan bonuslar faqat Premyer-liga, Chempionlar ligasi va Angliya milliy kubok musobaqalari doirasida amal qiladi.
Shu sabab, agar "Manchester Siti" quyi divizionga tushirilsa, ushbu to‘lovlar, shuningdek, yevrokuboklarda ishtirok etish uchun beriladigan bonuslar ham bekor qilinishi mumkin.
Ronaldu yoki Jezush? Portugaliyaliklar tanlovini qildi
Ikki futbolchi zo‘rlash ishida qo‘lga olindi
Osiyo o‘yinlari: O‘zbekistonlik chempion va murabbiylarga beriladigan mukofotlar ma’lum
