Luvrdagi o‘g‘rilik tashkilotchilari “slavyan aksentiga ega erkaklar” sifatida ta’riflandi — Le Parisien

Fransuz nashri ma’lumotlariga ko‘ra, voqeadan bir necha kun oldin “slavyan aksentida so‘zlovchi” ikki erkak o‘g‘rilik ishtirokchilaridan biri sifatida gumonlanayotgan 30 yoshli Abdulay N.ga 15 ming yevro evaziga “shartnoma” taklif qilgan.

"Boshqa gumonlanuvchi, 35 yoshli Jazoirlik Ayed G., uni faqat laqabi orqali tanigan odam yollaganini aytgan. Polisiya ularning ko‘rsatmalariga ehtiyotkorlik bilan yondashmoqda, ammo tergov “chet eldagi homiylarga” olib borishi mumkinligini inkor etmaydi", deya yozmoqda Le Parisien.

19 oktyabr kuni niqob taqqan jinoyatchilar Luvrga kirib, imperatorlik kolleksiyasiga tegishli to‘qqizta eksponatni, jumladan Napoleon va uning rafiqasi Jozefinaga tegishli zargarlik buyumlarini o‘g‘irlashgandi. O‘g‘irlik natijasida yetkazilgan zarar 88 million yevro deb baholanmoqda. O‘g‘irlikda gumonlanuvchi sifatida 7 kishi qo‘lga olingan.