Kabo-Verde orollarida maktab o‘quvchilari bo‘lgan avtobus 30 metrlik jarlikdan quladi — kamida 25 kishi halok bo‘ldi

Kabo-Verdening Fogu orolida maktab o‘quvchilari va o‘smirlar bo‘lgan avtobus yo‘ldan chiqib, 30 metrlik jarlikdan qulashi oqibatida kamida 25 kishi halok bo‘ldi. Avtobusda 32 kishi bo‘lgan. Ular o‘quv yili boshlanishi arafasida Ponta-Verde sohiliga yo‘l olgan edi.

Hodisa orolning shimolidagi burilishlarga boy sohil yo‘lida sodir bo‘lgan. Noma’lum sabablarga ko‘ra avtobus yo‘l chetidagi to‘siqni buzib o‘tib, qoyalarga qulagan. Mahalliy hokimiyat qurbonlar soni yana ortishi mumkinligidan ogohlantirmoqda.

Qutqaruv ishlari hududning borish qiyin bo‘lgani sababli murakkab kechmoqda. Avtobus qulagan joyga mashinalarda yetib borishning imkoni yo‘q, shuning uchun qutqaruvchilar u yerga piyoda tushishga majbur bo‘lgan. Ayrim yo‘lovchilar vayronalar ostida qisilib qolgan, boshqalari esa avtobusdan otilib ketgan.

Og‘ir jarohat olgan bir necha tirik qolgan yo‘lovchi shifoxonalarga yetkazilgan. Ularning ayrimlari hanuz og‘ir ahvolda.