Isroil xavfsizlik kabineti Eron atrofidagi vaziyatni muhokama qildi.

Isroil xavfsizlik kabineti AQSh va Eron o‘rtasidagi keskinlik saqlanib qolayotgani hamda Isroil bosh vaziri Binyamin Netanyahuning Tehronga nisbatan keskin bayonotlari fonida yig‘ilish o‘tkazdi.

Isroilning davlat telekanali KAN ma’lumotlariga ko‘ra, mamlakatda hushyorlik darajasi yuqori bo‘lib qolmoqda. Yig‘ilishda Netanyahu «Eron rejimi tugashi yaqinlashmoqda» deb bayonot berib, hokimiyatning Eronda almashishi Isroilning asosiy maqsadlaridan biri bo‘lib qolayotganini ta’kidlagan.

Avvalroq bosh vazir Eron Isroilga zarba bergan taqdirda, «vayronkor zarba»ga duch kelishini aytgan edi. Xavfsizlik kabineti muhokamalarining tafsilotlari oshkor qilinmagan.

Bir kun avval Isroil armiyasi «bir vaqtning o‘zida bir nechta frontda kutilmagan, murakkab va keng ko‘lamli urush» ssenariyi bo‘yicha to‘satdan harbiy mashg‘ulotlar o‘tkazdi.

Mashg‘ulotlar davomida yuqori harbiy qo‘mondonlikning bir nechta yo‘nalishda bir vaqtning o‘zida yuzaga kelishi mumkin bo‘lgan inqirozlarga tayyorgarligi tekshirildi. Zaxira kuchlari jalb qilindi va keng ko‘lamli tahdid sharoitida harakat qilish mashq qilindi.

Isroil armiyasi Bosh shtabi boshlig‘i Eyal Zamir qurolli kuchlar «tarang va beqaror davr»da ekanini va voqealarning kutilmaganda rivojlanishiga tayyor turishi kerakligini bildirdi.

Zamirning aytishicha, Isroil armiyasi dushmanlarga zarba berish imkoniyatlariga ega ekanini va mustaqil ravishda harakat qilishga tayyorligini ham namoyish etmoqda.

Shu bilan birga, rasmiy ravishda mashg‘ulotlar aynan Eronga qarshi operasiyaga tayyorgarlik sifatida e’lon qilinmagan. Ssenariy bir vaqtning o‘zida bir nechta frontda tahdidlar yuzaga kelishini nazarda tutgan.

Isroil xavfsizlik kabinetining yig‘ilishi AQSh va Eron o‘rtasida davom etayotgan harbiy qarama-qarshilik fonida bo‘lib o‘tdi.

Tehron Hurmuz bo‘g‘ozi hududida yangi choralar tayyorlayotganini ma’lum qildi va AQShning yangi hujumlari sodir bo‘lgan taqdirda, mintaqadagi Amerika energetika infratuzilmasiga javob zarbalari berilishi mumkinligidan ogohlantirdi.

Eron, shuningdek, Basra qo‘ltig‘i hududida yangi cheklangan zona e’lon qilishni rejalashtirmoqda.