Isroil AQSh harbiy yordamidan bosqichma-bosqich voz kechishni rejalashtirmoqda

Isroil AQSh harbiy yordamidan bosqichma-bosqich voz kechishni hamda Vashington bilan yangi shartlar asosidagi hamkorlikka o‘tishni niyat qilmoqda. Bu haqda Isroil Bosh vaziri Binyamin Netanyaxu idorasi tomonidan e’lon qilingan bayonotda aytiladi.

Bosh vazir idorasining qayd etishicha, 1996-yilda Netanyaxu AQShning 1,2 milliard dollarlik iqtisodiy yordamidan bosqichma-bosqich voz kechishga va’da bergan edi — idora ma’lumotiga ko‘ra, ushbu va’da bajarilgan. Oradan 30 yil o‘tib, Bosh vazir Isroil iqtisodiyoti AQShning harbiy yordamisiz ham faoliyat yurita oladigan darajada mustahkam ekaniga ishonch bildirmoqda.

Idora ta’kidlashicha, ushbu qadam yordam modelidan hamkorlik modeliga o‘tishni anglatadi. Shuningdek, AQSh Davlat kotibi Marko Rubioning so‘zlariga tayanib, yordamni to‘xtatish tashabbusi aynan Isroil tomonining o‘zidan chiqqani qayd etildi.