FIFA prezidenti Janni Infantino xalqaro futbol tashkiloti rahbarligidan ketish haqidagi talablarga javob qaytardi. U o‘z vakolatlarining qonuniyligini ta’kidlab, kelajagi milliy futbol federasiyalari qaroriga bog‘liq ekanini bildirdi.
FIFA Forward Enterprise loyihasi atrofidagi mojarodan keyin UYEFA rahbari Aleksander Cheferin va KONKAKAF prezidenti Viktor Montalyani Infantinoning iste’fosini talab qilgan edi.
«Meni dunyoning 211 ta milliy assosiasiyasi saylagan. Futbol barchaga tegishli bo‘lsa, har bir federasiyaning ovozi teng ahamiyatga ega bo‘lishi kerak. Shuning uchun ko‘pchilikning qarorini hurmat qilishimiz shart», — dedi Infantino.
FIFA rahbari o‘z pozisiyasini himoya qilar ekan, Osiyo va Afrika futbol tashkilotlari tomonidan qo‘llab-quvvatlanayotganini alohida ta’kidladi.
E’tiborlisi, OFK prezidenti Shayx Salmon bin Ibrohim al-Xalifa avgust oyida Infantinoni tanqid qilgan rahbarlar qatorida bo‘lgan. Biroq oktyabr oyida Osiyo konfederasiyasi uning qayta saylanishini qo‘llab-quvvatladi.
Kelishmovchilikka FIFA musobaqalarining tijoriy huquqlari bilan bog‘liq FIFA Forward Enterprise tashabbusi sabab bo‘lgan. Loyiha doirasida jahon chempionati va boshqa turnirlar bilan bog‘liq tijoriy ulushlarni xususiy investorlarga sotish ko‘zda tutilgan, ammo keskin e’tirozlardan so‘ng reja bekor qilingan.
Infantino futbol taqvimi, turnirlar formati, ishtirokchilar soni va tijoriy masalalar bo‘yicha turli qarashlar bo‘lishini tabiiy holat deb baholadi. Uning fikricha, bunday kelishmovchiliklar yakuniy qarorni qabul qiladigan milliy federasiyalarning huquqini o‘zgartirmaydi.
FIFA prezidentligi uchun navbatdagi saylov 2027 yil mart oyida o‘tkaziladi. Infantino yana bir muddatga o‘z nomzodini ilgari surmoqda.
Rossiya terma jamoasi sobiq futbolchisi O‘zbekistonni Nigeriyaga tenglashtirdi
«Oltin to‘p» g‘olibi nomi marosimdan oldin oshkor bo‘ldimi?
Bibisora Asaubayeva Javohir Sindorov bilan to‘yi haqidagi xabarlarga munosabat bildirdi
