Hindiston Isroil bilan mudofaa pakti tuzish haqidagi xabarlarni rad etdi

Hindiston Tashqi ishlar vazirligi Nyu-Dehli go‘yoki Turkiya, Saudiya Arabistoni va Pokiston ittifoqiga javoban Tel-Avivga mudofaa kelishuvini tuzishni taklif qilgani haqidagi xabarlarni «feyk» deb atadi.

Bu da’vo ijtimoiy tarmoqlarda tarqalgan. Hindiston Tashqi ishlar vazirligining faktlarni tekshirish bo‘limi ushbu xabar skrinshotini «feyk» belgisi bilan e’lon qildi. «Biz ijtimoiy tarmoqlarda sun’iy intellekt yordamida yolg‘on kontent yaratish orqali tarqatilayotgan bunday zararli xabarlardan ogoh bo‘lishga chaqiramiz», — deya ma’lum qildi vazirlik.

Ushbu xabarlar Pokiston, Saudiya Arabistoni va Turkiya o‘rtasida «Makkadagi qo‘shma mudofaa kelishuvi» imzolanganidan keyin paydo bo‘ldi. Kelishuv uch davlatning harbiy hamkorligi va umumiy xavfsizligini kuchaytirishni nazarda tutadi.

Pokiston Tashqi ishlar vazirligi kelishuv jamoaviy tiyib turish salohiyatini mustahkamlashga qaratilganini ma’lum qildi. Kelishuvga ko‘ra, «uch davlatdan birortasiga qilingan har qanday qurolli hujum ularning barchasiga qilingan hujum sifatida ko‘rib chiqiladi». Hujjat, shuningdek, turli yo‘nalishlarda mudofaa hamkorligini kengaytirishni nazarda tutadi.

Shu bilan birga, Hindiston bosh vaziri Narendra Modi va Isroil bosh vaziri Binyamin Netanyaxu payshanba kuni telefon orqali suhbatlashdi. Suhbat davomida tomonlar ikki davlat o‘rtasidagi maxsus strategik sheriklikni yanada rivojlantirish va turli sohalardagi ikki tomonlama hamkorlikni muhokama qildi.

Jaysvalning aniqlik kiritishicha, qo‘ng‘iroq Isroil tomoni tashabbusi bilan amalga oshirilgan. Uning so‘zlariga ko‘ra, tomonlar Hindiston va Isroil o‘rtasidagi munosabatlar hamda turli sohalardagi hamkorlikni yanada mustahkamlash masalalarini muhokama qilgan.